හිමිකම සනාථ කිරීමට නොහැකිවූ වාහන නිවසකින් හමුවෙයි

ගණේමුල්ල - ගලහිටියාව ප්‍රදේශයේ නිවසක හිමිකම සනාථකිරීමට නොහැකිවූ සුඛෝපභෝගී ජීප් රථ 3ක් සහ වැගන් ආර් රථයක් පොලීසිය විසින් සොයාගෙන තිබේ.

සොයාගත් එම වාහනවල වටිනාකම කෝටි 12කට අධික බව පොලීසිය සඳහන් කළේය.

රාගම බටුවත්ත ප්‍රදේශයේ පොලිස් මාර්ග බාධකයෙදී පොලිස් නිලධාරීන් විසින් බෙන්ස් වර්ගයේ මෝටර් රථයක් පරීක්ෂාවට ලක්කිරීමට උත්සාහ දැරූ අවස්ථාවේ පොලිස් නිලධාරීන්ට අසභ්‍ය වචනයෙන් බැනවැදී පළාගිය පුද්ගලයෙකු අත්අඩංගුවට ගෙන තිබුණි.

පළායන අවස්ථාවේ රිය පැදවූ පුද්ගලයා බීමත්ව සිට ඇති අතර බෙන්ස් රථය ගාල්කර තිබූ ගණේමුල්ල - ගලහිටියාව ප්‍රදේශයේ නිවසක් පරීක්ෂා කර ඇති අතර එහිදී හිමිකම සනාථකිරීමට නොහැකිවූ එම වාහන සොයාගෙන ඇත.

නිවස පරීක්ෂාකරන අවස්ථාවේ කලහකාරී ලෙස හැසිරුණු නිවෙස් හිමියා, බිරිඳ සහ රථය පැදවූ රියැදුරා අත්අඩංගුවට ගෙන වත්තල මහෙස්ත්‍රාත් හමුවට ඉදිරිපත් කිරීමෙන් පසු ජනවාරි 17 දක්වා රක්ෂිත බණ්ධනාගාරගතකර කෙරුණි