අමෙරිකාව අසරණ කරන ළැව් ගින්න

අමෙරිකාවේ ලොස් ඇන්ජලීස් අවට ඇති වූ ළැව් ගින්න මේ වනවිට හොලිවුඩ් කඳුකර ප්‍රදේශය දක්වා පැතිරී තිබෙන බව විදෙස් මාධ්‍ය වාර්තා කරයි.

හොලිවුඩ් කඳුකරයේ ගින්න වේගයෙන් ව්‍යාප්ත වෙමින් පවතින බවත්, එය පාලනය කිරීමට ඇති හැකියාව 'ශුන්‍ය' බවත් වාර්තා වේ.

ලොස් ඇන්ජලීස් ඉතිහාසයේ වඩාත් විනාශකාරී ළැව් ගින්න ලෙසින් මෙය සැලකෙන අතර, මේ හේතුවෙන් පුද්ගලයින් පස් දෙනෙකු මියගොස් ඇති බවට මේ වනවිට තහවුරු වී ඇත.

මෙම තත්ත්වය ලොස් ඇන්ජලීස්වලට අමතරව අසල්වැසි ප්‍රාන්තවලටද බලපා ඇති අතර, අවම වශයෙන් ළැව් ගිනි පහක් පැතිර යමින් පවතින බව වාර්තා වේ.

කෙසේ නමුත් ඉන් ළැව් ගිනි තුනක් සම්පූර්ණයෙන්ම පාලනය කර නොමැති අතර, මේ හේතුවෙන් 137,000කට වැඩි පිරිසක් ඉවත් කිරීමට බලධාරීන් පියවරගෙන ඇත.

පසුගිය අඟහරුවාදා ඇරඹුණු ළැව් ගින්න මේ වනතුරුම ඇවිලෙන්නේ නොනවතින සුළං ප්‍රවාහයත් සමගින්ය. 

ලොස් ඇන්ජලීස් නගරාධිපතිනි කරෙන් බාස් මෙම ළැව් ගින්න හඳුන්වා ඇත්තේ ගිනි කුණාටුවක් ලෙසින්ය. 

බලන බලන සෑම තැනකම ගින්න වන අතර, ඒ හේතුවෙන් නගරයට බියජනක ආලෝකයක් එක්කර ඇති බව විදෙස් මාධ්‍ය පවසයි.

සීඝ්‍රයෙන් පැතිරෙන මෙම ළැව් ගින්න පාලනය කිරීමට හෙලිකොප්ටර් මගින් ජලය හෙලීම සිදුවුවත්, දැඩි සුළං නිසා එය මුළුමනින්ම නිවා දැමීමට හැකියාවක් ලැබී නොමැත.

හොලිවුඩ් පුරවරයේ සුප්‍රකට නළු නිළියන් ඇතුළු සිනමා ශිල්පීන්ගේ නිවහන් පිහිටි ප්‍රදේශවලින්ද ඔවුන්ට ඉවත්වන ලෙස ලොස් ඇන්ජලීස්හි ගිනි නිවන දෙපාර්තමේන්තුව දැනුම් දී තිබේ.

සුප්‍රකට ඔස්කාර් සම්මාන උළෙල පැවැත්වෙන ඩොල්බි තියටර් නැත්නම් ඩොල්බි රඟහල පිහිටා තිබෙන්නේ මෙම ප්‍රදේශයේය.

මෙම වසරේ ඔස්කාර් සම්මාන උලෙළේ නාමයෝජනා ඉදිරි සතියේ ප්‍රකාශයට පත්කිරීමට නියමිතව ඇති වුවත්, ළැව් ගින්න හේතුවෙන් එය දැනටමත් දින දෙකකින් කල්දමා තිබේ.

ලොස් ඇන්ජලීස් පුරවරයට බටහිර දෙසින් පිහිටි ධනකුවේරයන්ගේ පාරාදීසයක් වූ පැලිසේඩ්ස් ප්‍රදේශයේ නිවාස සියල්ල පාහේ මේ වනවිට ළැව් ගින්නෙන් විනාශයට පත්ව ඇත.

සුප්‍රකට සැන්ටා මොනිකා සහ මලිබු අතර පැතිරුනු පැලිසේඩ්ස් ළැව් ගින්න නතරවී ඇත්තේ පැසිෆික් සාගර වෙරලාසන්නයට පැමිණීමෙන් අනතුරුවය. 

මේ හේතුවෙන් පැසිෆික් සාගර වෙරලාසන්නයේ පිහිටි නිවාසද ළැව් ගින්නෙන් වීනාශ වී ඇත.

මෙම ළැව් ගිනි නිසා ඇති වූ මූලික හානිවල ආර්ථික පාඩුව අමෙරිකානු ඩොලර් බිලියන 50ක ඉක්මවන බව වාර්තා වේ.

ගිනි නිවන භටයින් දෙදහසකට ආසන්න සංඛ්‍යාවක් මෙම ලැව් ගිනි නිවීම සඳහා යෙදවුවත් එම සංඛ්‍යාවද ප්‍රමාණවත් නොවන බව වාර්තා වේ.

මේ හේතුවෙන් අවට ප්‍රාන්ත 06කින් කැලිෆෝනියා ප්‍රාන්තය වෙත අතිරේක ගිනි නිවන රථ 250ක් සහ ගිනිනිවන භටයින් දහසක් පමණ රැගෙනවිත් තිබේ.

කැලිෆෝනියා ළැව්ගින්නෙන් නිවාස අහිමිවූ පිරිස් අතර හොලිවුඩ් පුරයේ ප්‍රකට සිනමා ශිල්පීන් සහ ප්‍රකට පුද්ගලයින් රැසක් සිටියි.

බිලී ක්‍රිස්ටල්, පැරිස් සිල්ටන්, ජේම්ස් වුඩ්, ජෙනිෆර් ඇනිස්ටන්, බ්‍රැඩ්ලි කූපර්, ටොම් හෑන්ක්ස්, රීස් විදර්ස්පූන්, ඇඩම් සැන්ට්ලර් සහ මයිකල් කීටන් ද ඒ අතර වෙයි.