මගීන් අතරමග බැස්සූ බස් රියදුරුට සහ කොන්දොස්තරට දඩයක්

පොලීසිය දියත් කරන රථවාහන මෙහෙයුම් හමුවේ නීතිය ක්‍රියාත්මක කිරීමට යාමේදී ගමනාන්තයට නොගොස් මගීන් අතරමග බස්සවා පිටත්ව ගිය මාර්ග අංක 100 පානදුර - පිටකොටුව බස් රථයේ හිමිකරු, රියදුරා සහ කොන්දොස්තරවරයාට එරෙහිව බස්නාහිර පළාත් මාර්ගස්ථ මගී ප්‍රවාහන අධිකාරිය පියවර ගෙන තිබේ. 

ඒ අනුව මෙලෙස ක්‍රියා කළ බස් රථයේ රියදුරාගේ සහ කොන්දොස්තරවරයාගේ සේවය ජනවාරි 15 වනදා දක්වා තහනම් කිරීමට පියවර ගෙන ඇති අතර, රියදුරාට රුපියල් 2,500ක දඩයක් සහ කොන්දොස්තරවරයාට රුපියල් 750ක දඩයක්ද පනවා ඇත.

එම කාලය ඇතුළත ඔවුන් දෙදෙනා වෙනත් බස්රථයක සේවය කළහොත් අදාළ බස් රථයේ මාර්ග බලපත්‍රය අහෝසි කරන බවද බස්නාහිර පළාත් මාර්ගස්ථ මගී ප්‍රවාහන අධිකාරිය පවසයි. 

එසේම, ජනවාරි 21 වනදා පුහුණුවක් සඳහා ඔවුන් දෙදෙනාව කැඳවීමටද කටයුතු කර තිබේ. 

ඊට අමතරව අදාළ බස් රථයේ මාර්ග බලපත්‍රය ජනවාරි 10 වනදා දක්වා පරීක්ෂණයකට යටත්ව අත්හිටුවීමටද මාර්ගස්ථ මගී ප්‍රවාහන අධිකාරිය කටයුතු කර ඇත.