සුදු කොඩි නඩු තීන්දුව අභියෝගයට ලක්කරමින් හිටපු යුද හමුදාපති සරත් ෆොන්සේකා අද(01) ශ්රේෂ්ඨාධිකරණයට අභියාචනයක් ගොනුකර තිබේ.
එම අභියාචනයට අදාළ පෙත්සම් ඔහුගේ නීතිඥවරුන් විසින් අද කොළඹ මහාධිකරණය වෙත බාර දී ඇත.
ත්රිපුද්ගල විනිසුරු මඬුල්ලේ බහුතර විනිසුරුවරු විසින් දුන් තීන්දුව නීතියට පටහැනි බව එම අභියාචනය මගින් සඳහන් කර තිබේ.
නඩුවේ ප්රධාන සාක්ෂිකාරිය වන සන්ඩේ ලීඩර් කර්තෘ ෆෙඩ්රිකා ජෑන්ස් විසින් ඉදිරිපත් කළ සාක්ෂි නිසි ලෙස ඇගයීමට ලක්නොකොට එහි පැමිණිල්ලට පමණක් වාසිදායක තත්ත්වයන් අධිකරණය විසින් සැලකිල්ලට බඳුන් කිරීම නිසා තමන්ට අසාධාරණයක් සිදුවූ බව ෆොන්සේකා මහතා සිය අභියාචනය මගින් සඳහන් කර තිබේ.
එමෙන්ම පැමිණිල්ල විසින් ඉදිරිපත් කළ වැදගත් සාක්ෂිකරුවන් නඩු විභාගය සඳහා නොකැඳවීම ද එම නඩු තීන්දුවේ දක්නට ලැබුණු තවත් දෝෂ සහිත තත්ත්වයක් බව අභියාචනය මගින් ප්රකාශ කර ඇත.
එමනිසා එම තීන්දුව නීතියට පටහැනි බව සඳහන් කරන අභියාචනය, එබැවින් සරත් ෆොන්සේකා මහතා සියලු චෝදනාවලින් නිදහස් කරන ලෙස අධිකරණයෙන් ඉල්ලා තිබේ.
