සැඩ පහරේ ගිය ට්‍රැක්ටර් රථයේ 30 දෙනෙක් ගිහින් ?
November 29, 2024 10:09 pm
අම්පාර, කාර්තිව්හිදී පසුගියදා ට්‍රැක්ටර් රථයක් සැඩ පහරකට හසුවීමෙන් සිසුන් පිරිසක් මියගිය අනතුර සිදුවන අවස්ථාවේදී එම ට්‍රැක්ටර් රථයේ පුද්ගලයින් 30 දෙනෙකුට ආසන්න පිරිසක් සිට ඇති බව පොලිස් විමර්ශනවලදී අනාවරණ වී තිබේ.
අනතුරින් සිසුන් 5 දෙනෙකු ජීවිතක්ෂයට පත්වූ අතර, අතුරුදන් තවත් සිසුවෙකු මෙතෙක් හමුවී නැහැ.
නින්දවූර් මද්‍රසා පාසලේ සිසුන් පිරිසක් පසුගිය 26 වැනිදා සැඩ පහරේ ගසාගෙන ගියේ පැවති වර්ෂාවත් සමග අම්පාර - කල්මුණේ මාර්ගය ජලයෙන් යටවී තිබීම හේතුවෙන් ඒ හරහා ට්‍රැක්ටර් රථයකින් යාමට උත්සාහ කිරීමේදීය.
මීට අදාළව කළ විමර්ශනයේදී කරුණු රැසක් හෙළිකරගන්නට හැකිවූ බව සිද්ධිය පිළිබඳව විමර්ශන මෙහෙයවන අක්කරෙයිපත්තුව පොලීසිය පවසයි.
ඒ අනුව පාසල් සිසුන් 11 දෙනා සමග එම පාසලේ විදුහල්පතිවරයා සමන්තරෙයි බලා ධාවනය වූ බස් රථයකට ගොඩවී ඇති අතර, එහි රියදුරා මාවඩිපල්ලි පාලම අසලදී බස් රථය ඉදිරියට ධාවනයට කර නැත්තේ මාර්ගය ජලයෙන් යට වී තිබීම හේතුවෙනි.
පොලීසියද එහිදී බස් රථ රියදුරාට පවසා ඇත්තේ ඉදිරියට ධාවනය නොකරන ලෙසටය.
ඒ අනුව සිසුන් පිරිස බස් රථයෙන් බස්වා ගත් විදුහල්පතිවරයා සමන්තුරෙයි ප්‍රදේශයට යාම සඳහා අදාළ ට්‍රැක්ටර් රථයට ගොඩවී තිබේ.
එම අවස්ථාව වනවිට අදාළ ට්‍රැක්ටර් රථයේ පුද්ගලයින් 14 දෙනෙකු සහ යතුරු පැදි 2ක් ද පටවා තිබී ඇත්තේ ජලය පිරී තිබූ මාර්ගය හරහා ගමන් කිරීම සඳහායි.
අදාළ පිරිස ප්‍රවාහනය කිරීම සඳහා යතුරුපැදියකට රුපියල් 500ක මුදලක්ද, පුද්ගලයෙකු සඳහා රුපියල් 300ක් බැගින්ද මුදල් අය කර ඇති බව පොලිස් විමර්ශනවලදී අනාවරණ වී තිබේ.
පාසල් සිසුන් ඇතුළු පිරිස සිට ට්‍රැක්ටරය අනතුරට ලක්ව තිබුණේ එලෙස ධාවනය වන අතරතුරය.
මේ අතර, වයස අවුරුදු 18ක් වන ට්‍රැක්ටර් රථයේ රියදුරාට වලංගු රියදුරු බලපත්‍රයක් තිබුණේදැයි සොයා විමර්ශන පැවැත් වේ.
සිද්ධිය සම්බන්ධයෙන් අත්අඩංගුවට ගනු ලැබූ නින්දවුර් කාෆිෆුල් උලුම් අරාබි විදුහලේ විදුහල්පති මොහමඩ් තස්ලිම් මොහොමඩ් අස්ලිම්, එම විදුහලේ ගුරුවරයෙකු සහ ට්‍රැක්ටර් රථයේ සහයකයින් දෙදෙනා සමන්තුරේ මහෙස්ත්‍රාත් අධිකරණයට ඉදිරිපත් කෙරුණි.
එහිදී සමන්තුරේ වැඩබලන මහෙස්ත්‍රාත් ඒ.එල්. සබිර් අහමඩ් මහතා විසින් අදාළ විදුහල්පතිවරයා සහ ගුරුවරයා දෙසැම්බර් මස 02 වෙනිදා දක්වා රක්ෂිත බන්ධනාගාර ගත කළ අතර, ට්‍රැක්ටරයේ සහායකයන් දෙදෙනා ඇප මත මුදාහරිනු ලැබීය.
