නිවසකට පැන තරුණියක් පැහැර ගැනීමට තැත් කරයි

බලහත්කාරයෙන් නිවසකට ඇතුළුවූ පුද්ගලයෙකු විසින් නිවැසියන් බියගන්වා එහි සිටි තරුණියක් පැහැරගැනීමට තැත් කිරීමේ සිද්ධියක් වලස්මුල්ලෙන් වාර්තා වෙයි.

වලස්මුල්ල පොලීසිය සඳහන් කළේ සිද්ධියට සම්බන්ධ සැකකරු අත්අඩංගුවට ගත් බවය.

වලස්මුල්ල පොලිස් වසමේ හොරේවෙල ප්‍රදේශයේදී ඊයේ (07) රාත්‍රියේ නිවසකට ඇතුළුවූ අදාළ සැකකරු නිවැසියන්ට ගිනිඅවි පෙන්වා බියගන්වා තරුණියක් පැහැර ගැනීමට තැත්කරන බවට 119 හදිසි ඇමතුම් අංකයට ලද තොරතුරක් මත වහාම ක්‍රියාත්මක වූ වලස්මුල්ල පොලීසියේ නිලධාරීන් එම ස්ථානය ගොස් තිබුණි.

මෙරට නිෂ්පාදිත ගිනිඅවි 02ක්, තහනම් පිහි 02ක්, යකඩ කූරු සහ යකඩ කැබලි සන්තකයේ තබාගෙන සිටි සැකකරු අත්අඩංගුවට ගැනීමට මහත් පරිශ්‍රමයක් දරන්නට සිදුවූ බව පොලීසිය වැඩිදුරටත් පැවසීය. 
  
අත්අඩංගුවට ගත් සැකකරු වයස අවුරුදු 22ක් වන දෙනියාය ප්‍රදේශයේ පදිංචිකරුවෙකි.

සැකකරු අදාළ තරුණිය සමග ප්‍රේම සම්බන්ධතාවයක් පවත්වාගෙන ගොස් ඇති අතර පසුව එය මීට මාස කිහිපයකට පෙර සැකකරු විසින් නවතා දමා තිබේ.

ඉන්පසුව සැකකරු මෙලෙස පැමිණ එම තරුණිය පැහැර ගැනීමට උත්සාහ කර ඇත.

සිද්ධිය පිළිබඳව වලස්මුල්ල පොලීසිය වැඩිදුර විමර්ශන සිදුකරයි.