ප්‍රමිතියෙන් තොර කෑම පෙට්ටි සහ වතුර බෝතල් ගැන ඔබ දැනුවත්ද ?
November 2, 2024 09:55 pm
දරුවන් භාවිතා කරන කෑම පෙට්ටි සහ වතුර බෝතල්වලින් 75%ක් ප්‍රමිතියෙන් තොර බව මහජන සෞඛ්‍ය පරීක්ෂකවරුන්ගේ සංගමය පවසයි.
මේ අතර ප්‍රමිතියෙන් තොර ප්ලාස්ටික් උපකරණ භාවිතයෙන් දරුවන්ගේ ජීවිතවලට දැඩි තර්ජනයක් සිදුවෙමින් පවතින බව ලෝක පිළිකා සංගමය ද අනාවරණ කර තිබේ.
ඒ අතර දරුවන්ට තිලිණ කරන සහ දරුවන් පරිහරණය කරන කෑම පෙට්ටි සහ වතුර බෝතල් ප්‍රමිතියෙන් තොර බවට විවිධ තොරතුරු අවස්ථා ගණනකදී අද දෙරණ ද රට හමුවේ අනාවරණ කළේය.
මහජන සෞඛ්‍ය පරීක්ෂකරුවන් පෙන්වා දී ඇත්තේ එහෙත් අදටත් ප්‍රමිතියක් නොමැති එවැනි උපකරණ මෙරට වෙළඳපොළේ දිනෙන් දින වැඩිවෙමින් පවතින බවයි.
මේ සම්බන්ධව අදහස් දක්වමින් මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ මහතා පැවසුවේ මෙම උපකරණ ඉතාමත් අවදානම් ලෙස දරුවන්ට බළපෑම් කරන බවය.
"දරුවෝ භාවිතා කරන කෑම පෙට්ටි සහ වතුර බෝතල් 75%කට එහා ප්‍රමාණයක් නුසුදුසු ප්ලාස්ටික්වලින් නිෂ්පාදනය කරපුවා කියලා ඉතාම පැහැදිලිව අපිට පේන්න තියෙනවා. චීනය වැනි රටවලින් ආනයනය කරනවා පාලනයකින් තොරව. ඉතාමත් අවදානම් විදිහට දරුවන්ට මේවා බළපෑම් කරනවා."
කෙසේ වෙතත් වෙළෙඳපොළට යන පාරිභෝගිකයාට මෙම භාණ්ඩ මිලදී ගැනීමේදී වැටහීමක් තිබේදැයි අප විමසීමක් කළා.
එහිදී බොහෝ පාරිභෝගියකින් පවසන්නේ, තමන් සැළකිලිමත් වන්නේ, භාණ්ඩයේ මිල සහ එහි ලස්සන පිළිබඳව පමණක් බවයි.
සෞඛ්‍ය බලධාරීන්ට අනුව ආහාර සහ ජලය දැමීම සඳහා භාවිත කරන ප්ලාස්ටික් ඇසුරුම් මිලදී ගැනීමේදී එහි පතුල මත BPA වලින් තොර හෝ අංක 5 සටහන් කර ඇද්දැයි නිරීක්ෂණය කළ යුතුවේ.
එසේ නොමැතිනම් වීදුරුවක් සමග ගෑරුප්පුවක සළකුණක් එම භාණ්ඩවල තිබේදැයි පරීක්ෂාකළ යුතු වේ.
මෙම සලකුණු දෙකම ඇත්නම් එවැනි උපකරණ ඔබේ දරුවාටත් ඔබටත් භාවිතයට සුදුසු බව සෞඛ්‍ය බලධාරීන් පෙන්වා දී තිබේ.
මේ සම්බන්ධව අදහස් දැක්වූ ජාතික බෝවන රෝග විද්‍යායතනයේ ළමා රෝග විශේෂඥ වෛද්‍ය විරාජ් ජයසිංහ මහතා,
"ශරීරයට අහිතකර නොයෙක් වර්ගයේ රසායනික ද්‍රව්‍ය ගණනාවක් ප්ලාස්ටික් වල අඩංගු වෙනවා. රසායනික ද්‍රව්‍ය අපගේ ශරීරගත වුවහොත් නොයෙක් වර්ගයේ දරුණු පිළිකා සෑදීමේ අවධානමක් තියෙනවා. දරුවෙක් නම් වර්ධනයට බාධා ඇති වෙන්නත් පුළුවන්. ප්ලාස්ටික් භාජනම අවශ්‍ය වෙනවානම් ආහාර ද්‍රව්‍ය ගබඩා කරන්න ප්‍රමිතියෙන් යුක්ත උපකරණම පාවිච්චි කරන්න ඕනේ."
විවිධ අංක සඳහන් කරමින් වෛළඳ පොළේ අලෙවි කෙරෙන ආකර්ශණිය කෑම පෙට්ටි සහ වතුර බෝතල් සම්බන්ධයෙන් ඉදිරියේදී වැටලීම් තීව්‍ර කරන බව මහජන සෞඛ්‍ය පරීක්ෂකවරුන්ගේ සංගමයේ සභාපති උපුල් රෝහණ පැවසීය.
"1980 අංක 26 දරන ආහාර පනත යටතේ නඩු පවරන්න පුළුවන්. ඉදිරියේදී අපි විශේෂ අවධානය යොමු කරලා විශේෂ පරීක්ෂා කිරීම් කරන්න බලාපොරොත්තු වෙනවා."
