මාරක අනතුරු කිහිපයක්

ප්‍රදේශ කිහිපයක ඊයේ (02) සිදුවූ මාර්ග අනතුරු හේතුවෙන් පුද්ගලයන් තිදෙනෙකු මියගොස් ඇති බව පොලීසිය පවසයි.

ඒ අනුව සූරියවැව දෙස සිට පදලංගල දෙසට ධාවනය වූ යතුරුපැදියක් මාර්ගයේ දකුණු පසට හැරවීමට යාමේදී පිටුපසින් පැමිණි ටිපර් රථයක් එම දිශාවටම ධාවනය කළ බස් රථයකට ඉස්සර කිරීමේදී යතුරුපැදියේ ගැටී තිබේ.

පසුව ටිපර් රථය මාර්ගයේ දකුණු පස නවතාගෙන සිටි යතුරුපැදියකද ගැටී ඇති අතර අනතුරින් දකුණු පස නවතාගෙන සිටි යතුරුපැදිකරු ටිපර් රථයට යටවීමෙන් මියගොස් ඇත.

මියගොස් ඇත්තේ අවුරුදු 78ක් වූ සූරියවැව ප්‍රදේශයේ පදිංචිකරුවෙකි.

අනතුරින් දකුණු පසට හැරවීමට ගිය යතුරුපැදිකාරිය හා එම යතුරුපැදියේ ගමන් ගත් අවුරුදු 04ක දැරියක් තුවාල ලබා සූරියවැව රෝහලට ඇතුළත් කර වැඩිදුර ප්‍රතිකාර සඳහා හම්බන්තොට මූලික රෝහල වෙත මාරු කර යවා තිබේ.

අනතුරින් පසු ටිපර් රථයේ රියදුරු පළාගොස් ඇති අතර ඔහු අත්අඩංගුවට ගැනීම සඳහා සූරියවැව පොලීසිය පරීක්ෂණ පවත්වයි.

තවද, දෙනියාය කිරිවැල්දොල මාර්ගයේ කිරිවැල්දොල හන්දිය ප්‍රදේශයේදී කිරිවැල්දොල දෙස සිට දෙනියාය දෙසට ධාවනය වූ ත්‍රීරෝද රථයක් රියදුරුට පාලනය කරගත නොහැකිව මාර්ගයෙන් ඉවතට ගොස් ප්‍රපාතයකට පෙරළි තිබුණි.

අනතුරින් ත්‍රීරෝද රථයේ රියදුරු, පිටුපස ගමන් කළ අවුරුදු 05ක් වන දරුවෙකු සහ අවුරුදු 18ක් වූ තරුණියක් තුවාල ලබා දෙනියාය රෝහලට ඇතුළත් කිරීමේදී ත්‍රීරෝද රථයේ රියදුරු මියගොස් ඇත.

මියගොස් ඇත්තේ අවුරුදු 45ක් වූ දෙනියාය ප්‍රදේශයේ පදිංචිකරුවෙකි.

මේ අතර කොස්කොඩ කඩුගොඩ මාර්ගයේ කඩුගොඩ සිට පොල්හේන අතුරු මාර්ගයේ ගමන් කළ කැබ් රථයක් රියදුරුට පාලනය කරගත නොහැකිව මාර්ගයෙන් ඉවතට ගොස් දුරකථන කණුවක ගැටී අනතුරක් සිදුව තිබුණි.

අනතුරින් කැබ් රථයේ රියදුරු හා පිටුපස ගමන් කළ කාන්තාවන් දෙදෙනෙකු තුවාල ලබා අවිස්සාවේල්ල රෝහලට ඇතුළත් කිරීමේදි එක්  කාන්තාවක් මියගොස් ඇත.

මියගොස් ඇත්තේ අවුරුදු 70ක් වූ තුම්මෝදර ප්‍රදේශයේ පදිංචිකාරියකි.