ඇතුළේ හිටියත් එළියේ ජයටම කෙරෙන 'කුඩු සළිඳුගේ' සෙල්ලම්
June 9, 2024 02:42 pm
සංවිධානාත්මක අපරාධකරුවෙකු හා මත්ද්‍රව්‍ය ජාවාරම්කරුවෙකු වන පානදුර කුඩු සළිඳු නමැත්තාගේ ගෝලයින් දෙදෙනෙකු පානදුර දකුණ ප්‍රදේශයේ දී අත්අඩංගුවට ගෙන තිබේ.
පොලිස් විශේෂ කාර්යය බළකාය විසින් සිදුකළ මෙහෙයුමක දී පානදුර දකුණ නල්ලූරුව ප්‍රදේශයේ දී යතුරුපැදියක් සමග එක් සැකකරුවෙකු අත්අඩංගුවට ගෙන ඇති බව පොලීසිය පැවසීය.
ඔහු සතුව තිබී රිවෝල්වර් අවි සඳහා භාවිත කරනු ලබන සජීවී පතරොම් 20ක්, අයිස් මත්ද්‍රව්‍ය ග්‍රෑම් 10යි මිලිග්‍රෑම් 400ක් හා මත්ද්‍රව්‍ය අලෙවියෙන් උපයාගන්නා ලද රුපියල් ලක්ෂ 42කට අධික මුදලක් සොයාගෙන තිබේ.
සැකකරුගෙන් සිදුකරන ලද ප්‍රශ්නකිරීම්වලදී නිවසක සිට එම මත්ද්‍රව්‍ය ජාවාරම මෙහෙයවමින් ආධාර අනුබල ලබාදුන් තවත් සැකකරුවෙකු අත්අඩංගුවට ගෙන ඇති බව සඳහන්ය.
සැකකරුවන් දෙදෙනා පානදුර නල්ලූරුව සහ මොරවින්න යන ප්‍රදේශවල පදිංචිකරුවන් බව පොලීසිය පැවසීය.
මොවුන්, සංවිධානාත්මක අපරාධකරුවෙකු වන කුඩු සළිඳු නමැත්තාගේ මත්ද්‍රව්‍ය ජාවාරම් ඩුබායි හි සිට මෙහෙයවන ප්‍රධාන ගෝලයින් දෙදෙනෙකුගේ මෙරට මත්ද්‍රව්‍යජාලය මෙහෙයවනු ලබන පුද්ගලයින් බව පොලීසිය සිදුකළ විමර්ශනවල දී අනාවරණය වී ඇත.
සැකකරුවන් සම්බන්ධයෙන් පානදුර දකුණ පොලීසිය වැඩිදුර විමර්ශන සිදුකරයි.
