කිරි අලෙවි සලේ මුරකරු ඝාතකයා කොටුවෙයි

ගලේවෙල පොලිස් වසමේ බෙලිගමුව ප්‍රදේශයේ පිහිටි ජාතික පශු සම්පත් සංවර්ධන මණ්ඩලයට අයත් ගොවිපොළක අලෙවිසලේ මුරකරු ඝාතනයට සැකපිට පුද්ගලයෙක් අත්අඩංගුවට ගෙන තිබේ.

පොලිස් මාධ්‍ය කොට්ඨාසය නිවේදනය කළේ, මාතලේ කොට්ඨාස අපරාධ විමර්ශන අංශය මඟින් විමර්ශනයක් පවත්වා අදාළ සැකකරුව අත්අඩංගුවට ගත් බවය.

ඒ අනුව අදාළ සැකකරු කොළඹ ප්‍රදේශයක සැඟව සිටිය දී ඊයේ (06) සවස තොටලඟ සේදවත්ත, පාලම අසලදී අත්අඩංගුවට ගෙන තිබේ.

එලෙස අත්අඩංගුවට ගෙන ඇත්තේ අවුරුදු 43ක් වූ කපුවත්ත, දඹුල්ල ප්‍රදේශයේ පදිංචිකරුවෙකි.

මාතලේ කොට්ඨාස අපරාධ විමර්ශන අංශය වැඩිදුර විමර්ශන සිදුකරයි.

පසුගිය ඔක්තෝබර් 25 වනදා රාත්‍රියේ කිරි අලෙවි සලට ඇතුළු වී එහි තිබූ භාණ්ඩ කිහිපයක් සොරාගත් සොරු කිහිපදෙනෙක් රාත්‍රි සේවයේ නිරතව සිටි මුරකරුව අත්පා සහ කට ගැට ගසා ඝාතනය කර තිබුණි.

එලෙස ඝාතනයට ලක්ව තිබුණේ කේ. ස්වාමිනාදන් නැමති 52 හැවිරිදි තිදරු පියෙකි.