පාසලක් තුළ පිපිරීමකින් සිසුන් තිදෙනෙක් රෝහලේ
October 17, 2023 05:18 pm
පාසලක් තුළ සිදුවූ පිපිරීමකින් සිසුන් තිදෙනෙකු තුවාල ලබා තිබේ.
ගම්පොළ අධ්‍යාපන කලාපයට අයත් මාවතුර කලෛමහල් දෙමළ විද්‍යාල භූමියේදී මෙම අනතුර සිදුවී ඇත.
පොලීසිය සඳහන් කළේ අනතුරෙන් තුවාල ලද සිසුන් තිදෙනා ගම්පොළ ශික්ෂණ රෝහලට ඇතුළත් කොට ඇති බවය.
වැඩිදුරටත් වාර්තා වූයේ ඔවුන්ගෙන් එක් සිසුවෙක් නේවාසිකව ප්‍රතිකාර ලබන බවය. ඔහු 06 ශ්‍රේණියේ ඉගෙනුම ලබන සිසුවෙකි.
පාසල් කාලය තුළදී මෙම සිසුන් තිදෙනා එළියට පැමිණි අවස්ථාවේදී බෝලයක් වැනි යමක් දැක ඇති අතර එහිදී එක් සිසුවෙකු එයට පා පහරක් එල්ල කර ඇත.
එහිදී එය පුපුරාගොස් ඇති අතර පිපිරීමත් සමග සිසුවාගේ සපත්තුව කැඩී ගොස් පාදයට හානී සිදුවී තිබේ.
මේ සම්බන්ධයෙන් අප පොලීසියෙන් කළ විමසීමකදී සඳහන් කළේ එලෙස පුපුරා ගියේ කුමක්ද යන්න මෙතෙක් තහවුරු වී නොමැති බවය.
