අනතුරුවලින් සිව්හැවිරිදි දැරියක් ඇතුළු 3ක් මරුට

සන්දිවේලි සහ ගල්ගමුව ප්‍රදේශවලදී සිදුවූ රිය අනතුරු දෙකකින් වයස අවුරුදු 4ක කුඩා දැරියක් සහ තවත් පුද්ගලයින් දෙදෙනෙකු මියගොස් තිබේ.

ඊයේ (18) එම අනතුරු සිදුව ඇති බව පොලීසිය පවසයි.

සන්දිවේලි පොලිස් වසමේ මඩකලපුව - වාලව්චේන ප්‍රධාන මාර්ගයේ වෙප්පඅඩි වංගුව ප්‍රදේශයේදී සිදුවූ රිය අනතුරකින් එකම පවුලේ පියා සහ කුඩා දියණිය ජීවිතක්ෂයට පත්ව ඇත.

මඩකලපුව දෙස සිට වාලව්චේන දෙසට ධාවනය වූ වෑන් රථයක් රියදුරුට පාලනය කරගත නොහැකිව මාර්ගයේ වම්පස තිබූ කොහොඹ ගසක ගැටීමෙන් එම අනතුර සිදුව තිබේ.

අනතුරින් බරපතළ තුවාල ලැබූ වෑන් රථයේ රියදුරු, ඔහුගේ දියණිය සහ බිරිඳ සන්දිවේලි රෝහලට ඇතුළත් කිරීමෙන් අනතුරුව වෑන් රථයේ රියදුරු හා ඔහුගේ දියණිය මියගොස් ඇත.

බරපතළ තුවාල ලැබූ බිරිඳ වැඩිදුර ප්‍රතිකාර සඳහා මඩකලපුව රෝහලට ඇතුළත් කර තිබේ.

මරණකරු වයස අවුරුදු 54ක් හා මියගිය දැරිය වයස අවුරුදු 04ක් වූ කාත්තන්කුඩි ප්‍රදේශයේ පදිංචිකරුවන් බව පොලීසිය පවසයි.

මේ අතර ගල්ගමුව - ආණමඩුව මාර්ගයේ වාලසේන ප්‍රදේශයේදී ආණමඩුව දෙස සිට ගල්ගමුව දෙසට ධාවනය වූ වෑන් රථයක් එයට ඉදිරියෙන් එම දිසාවට ධාවනය වූ යතුරුපැදියක පිටුපස ගැටී ඇත.

අනතුරින් තුවාල ලැබූ අඹුසැමි යුවළක් ගල්ගමුව රෝහලට ඇතුළත් කිරීමෙන් පසු යතුරුපැදිකරු මියගොස් ඇත.

එසේ මියගොස් ඇත්තේ, 46 හැවිරිදි මහනාන්නේරිය ප්‍රදේශයේ පදිංචිකරුවෙකි.