බහින්බස් වීමක් දුරදිග යාමෙන් සිදුවූ ඝාතනය
August 30, 2023 04:34 pm
මිතුරන් දෙදෙනෙකු අතර ඇතිවූ බහින්බස් වීමක් දුරදිග යාමෙන් ඇතිවූ ගැටුමක් හේතුවෙන් මුගුරකින් පහර දී එක් අයෙකු ඝාතනය කර තිබේ.
අද (30) උදෑසන මෙම සිදුවීම වාර්තා වී තිබුණේ, ලිඳුල පොලිස් වසමේ නාගසේන, වලගහවත්ත ප්‍රදේශයේදීය.
සැකකරු විසින් මිතුරාගේ හිසට මුගුරකින් පහර දී ඇති අතර, පහරදීමෙන් තුවාල ලැබූ මිතුරා ලිඳුල ප්‍රාදේශීය රෝහල වෙත ඇතුළත් කර වැඩිදුර ප්‍රතිකාර සඳහා නුවරඑළිය රෝහල වෙත ඇතුළත් කිරීමෙන් පසු මිය ගොස් ඇත.
මෙසේ මියගොස් ඇත්තේ ලිඳුල පොලිස් වසමට අයත් නාගසේන, වලගහවත්තේ පදිංචිව සිටි වී.බෙන්ජිමන් නමැති 41 හැවිරිදි දෙදරු පියෙකි.
ඝාතනය සම්බන්ධයෙන් මරණකරුගේ මිත්‍රයා සැකපිට අත්අඩංගුවට ගෙන තිබේ.
සැකකරු, නුවරඑළිය මහෙස්ත්‍රාත් අධිකරණය වෙත ඉදිරිපත් කිරීමට නියමිත අතර, ඝාතනය සම්බන්ධයෙන් ලිඳුල පොලීසිය වැඩිදුර පරික්ෂණ පවත්වයි.
