අන්තර් පාසල් පළමු පෙළ රග්බි ලීග් කිරුළ ශාන්ත පීතර විද්‍යාලයට
August 19, 2023 07:54 pm
2023 අන්තර් පාසල් පළමු පෙළ ලීග් රග්බි තරගාවලියේ ශූරතාව හිමි කරගැනීමට අපරාජිත බම්බලපිටිය ශාන්ත පීතර විද්‍යාලය සමත් වුණි.
ඒ තරගාවලියේ සුපිරි වටය යටතේ අද (19) පැවැති අවසන් තරගයේදී කොළඹ ඉසිපතන විද්‍යාලය පරාජය කරමිනි.
ලීග් ප්‍රසාද ලකුණු සටහනේ පෙරමුණේ පසුවූ කණ්ඩායම් දෙක වන බම්බලපිටිය ශාන්ත පීතර විද්‍යාලය සහ කොළඹ ඉසිපතන විද්‍යාලය අතර අද පැවති තරගයෙන් ජයගන්නා කණ්ඩායමට ලීග් කිරුළ හිමිවීමට නියමිතව තිබූ හෙයින් තරගය නැරඹීම සඳහා විද්‍යාල දෙකටම සහාය දක්වන ප්‍රේක්ෂකයන්ගේ දැඩි උනන්දුවක් දක්නට ලැබුණි.
ගෝල දිනුමක්, උත්සාහක දිනුමක් සහ දඬුවම් පහරක් සාර්ථක කරගත් ශාන්ත පීතර ක්‍රීඩකයින් පළමු අර්ධයේ පෙරමුණ ගත්තේ ලකුණු 15ට 10ක් ලෙසය.
දෙවන අර්ධයේදී ශාන්ත පීතර විද්‍යාලය ලකුණු 13ක් රැස් කරගනිද්දී ඉසිපතන විද්‍යාලයට දෙවන අර්ධයේදී රැස්කරගත හැකිවූයේ ලකුණු 7ක් පමණි.
ඒ අනුව ලකුණු 28ට 17ක් ලෙස තරගය ජයගත් බම්බලපිටිය ශාන්ත පීතර විද්‍යාලය 2023 අන්තර් පාසල් ලීග් රග්බි කිරුළ හිමිකර ගත්තේය.
බම්බලපිටිය ශාන්ත පීතර විද්‍යාලය අන්තර් පාසල් පළමු පෙළ ලීග් රග්බි තරගාවලියේ ශූරතාව හිමි කරගත්තේ වසර 13කට පසුවය.
