පුතාව සොයා ආ මාරයෝ පියාට වෙඩි තබති

අම්බලන්තොට කොග්ගල්ල ප්‍රදේශයේ අද (19) අලුයම සිදුකළ වෙඩිතැබීම සම්බන්ධයෙන් පුද්ගලයින් තිදෙනෙක් සැකපිට අත්අඩංගුවට ගත් බව පොලිස් මාධ්‍ය ප්‍රකාශක ජ්‍යෙෂ්ඨ පොලිස් අධිකාරී නීතිඥ නිහාල් තල්දූව මහතා පවසයි.

එම වෙඩි තැබීමෙන් කොග්ගල්ල ප්‍රදේශයේ නිවසක සිටි 62 හැවිරිදි පුද්ගලයෙකු ජීවිතක්ෂයට පත්විය.

කොග්ගල්ල උතුරු කඩවර ප්‍රදේශයේ පිහිටි නිවසකට අද අලුයම නාඳුනන පුද්ගලයින් තිදෙනෙකු පැමිණ නිවසේ කවුළුවකින් එබිකම් කර ඇති බව පොලීසිය පවසයි.

එහිදී එම නිවසේ සිටි දැරියක විසින් මෙම පිරිස දැක කෑ ගැසීමත් සමඟ අදාළ නාඳුනන පුද්ගලයින්ගේ ඉලක්කය වූ පුද්ගලයාගේ පියා නිවසින් පිටතට පැමිණ තිබේ.

එහිදී සැකකරුවන් එම පුද්ගලයාට වෙඩි තබා පළාගොස් තිබුණි.

පොලිස් මාධ්‍ය ප්‍රකාශකවරයා පැවසුවේ මියගිය පුද්ගලයා සම්බන්ධයෙන් කිසිදු චෝදනාවක් පොලිසිය වෙත ලැබී නොතිබුණු බවත් නමුත් මෙම නිවසේ හොර හරක් ජාවාරම සම්බන්ධ බවට චෝදනා එල්ලවී ඇති පුද්ගලයින් සිට ඇති බවය.

වෙඩිතැබීම සිදුකරන අවස්ථාවේ එම පුද්ගලයා නිවසේ සිට නොමැති බව සඳහන් ය.

අත්අඩංගුවට ගත් සැකකරුවන්ගෙන් දෙදෙනෙක් අවුරුදු 28 සහ 35 වයස්වල එම ප්‍රදේශයේම පුද්ගලයින් බවත් තුන්වැනි සැකකරු ගොන්නොරුව පදිංචි 32 හැවිරිදි අයෙක් බවත් පොලීසිය පැවසීය.

වෙඩිතැබීම සඳහා දේශීයව නිෂ්පාදනය කළ ගිනිඅවි දෙකක් භාවිත කර ඇති බවටත් වෙඩි ප්‍රහාර 3ක් එල්ලකර ඇති බවටත් තොරතුරු අනාවරණය වී තිබේ.