හරක් කටා සහ කුඩු සළිඳු CIDයට

මැඩගස්කරයේ දී අත්අඩංගුවට ගෙන මෙරටට රැගෙන ආ නඳුන් චින්තක නොහොත් "හරක් කටා" සහ සළිඳු මල්ෂික නොහොත් "කුඩු සළිඳු"  ඇතුළු පිරිස අද (15) උදෑසන අපරාධ පරීක්ෂණ දෙපාර්තමේන්තු කණ්ඩායමක් විසින් රැගෙන ගිය බව අප ගුවන්තොටුපොළ වාර්තාකරු පැවසීය.

එම පිරිස අද උදෑසන 07:10ට පමණ කටුනායක ගුවන්තොටුපොළේ කාර්ගෝ පර්යන්තය හරහා පිටව ගියේය.

එම සැකකරුවන් පිරිස දිවයිනට රැගෙන ඒම සඳහා අපරාධ පරික්ෂණ දෙපාර්තමේන්තුවේ නිලධාරීන් කණ්ඩායමක් පසුගියදා මැඩගස්කරය බලා පිටත්ව ගිය අතර ඔවුන් කෙන්යාව, ඉන්දියාව හරහා අද මෙරටට පැමිණ තිබුණි.

"හරක් කටා" සහ "කුඩු සළිඳු" සමග තවත් හය දෙනෙකු එම කණ්ඩායමේ සිටින අතර නඳුන් චින්තකගේ බිරිඳ බව පැවසෙන විදෙස් ජාතික කාන්තාවක් ද එම කණ්ඩායමට අයත් ය.

පසුගිය 07 වනදා මෙම පිරිස අත්අඩංගුවට ගත් බවට වාර්තා වූ අතර මැඩගස්කර බලධාරීන් ඒ පිළිබඳව මෙරටට දැනුම් දී තිබුණි.