ගොයම් කහ වෙන හේතුව හෙළිවෙයි

වී වගාවට අවශ්‍ය පෝෂක නිසි පරිදි නොලැබීම නිසා කහ පැහැගැන්වීමේ රෝගය මතුව ඇතැයි ක්ෂේත්‍ර පරීක්ෂාවේදී අනාවරණ වූ බව කෘෂිකර්ම දෙපාර්තමේන්තුව පවසයි.

ගොයම් ගස් කහ පැහැ වන නෙමටෝඩා හෙවත් මූල ගැටිති වටපණු රෝගය පසුගිය කාලය පුරාම බොහෝ ප්‍රදේශවලින් වාර්තා වුණි. 

ඇළහැර ගොවි ව්‍යාපාර යටතේ වගාකළ දියබෙදුම නෑහින්න ප්‍රදේශයේ ගොවීන්ගේ වී වගාවද අදවන විට කහ පැහැ ගැන්වීමේ රෝගයට ගොදුරුවී අවසන්ය. 

බතලේගොඩ වී පර්යේෂණ සහ සංවර්ධන ආයතනය සහ කෘෂිකර්ම දෙපාර්තමේන්තුව අද (05) ප්‍රකාශ කළේ වී වගාවට අවශ්‍ය පෝෂක නිසි පරිදි නොලැබීම නිසා එම කහ පැහැ ගැන්වීමේ රෝගය මතුව ඇතැයි ක්ෂේත්‍ර පරීක්ෂාවේදී අනාවරණ වූ බවය.

බතලේගොඩ වී පර්යේෂණ සහ සංවර්ධන ආයතනයේ අධ්‍යක්ෂ ජයන්ත සේනානායක මහතා,

"ප්‍රධානව දක්නට ලැබුණේ බංඩි පොහෙර ප්‍රමාණවත් පරිදි නොයේදීම. ශාඛවල වර්ධනයත් අඩුවුණා. ඒ වගේම වටපණු හානිය සමහර තැන්වල තීව්‍රවෙන්න බලපෑවා. අපි දැනට පස් සාම්පල 200කට වැඩි ප්‍රමාණයකුත්, ශාඛ සාම්පල 150කට වැඩි ප්‍රමාණයකුත් අරගෙන තියෙනවා. මේවත් අපේ විද්‍යාගාරවල විශ්ලේෂණය කරනවා. අපි කාබනික පොහොර සම්පලත් විශ්ලේෂණය කරනවා."    

මේ තත්ත්වය මත මහ කන්නයේ අස්වනුවල අඩුවක් සිදුවිය හැකි බවට හුරුළුවැව එකාබද්ධ ගොවි සංවිධානය අනතුරු අඟවයි.

හුරුළුවැව එකාබද්ධ ගොවි සංවිධානයේ ලේකම් උපාලි ඒකනායක මහතා,

"යුරියා කිලෝ 163ක් පමණයි ලබාදුන්නේ. දිලීර පලිබෝධවලට අද වී වගාව පත්වෙලා. 40%ක අස්වනු හානියක් තියෙනවා."

කෙසේ වෙතත් කෘෂිකර්ම දෙපාර්තමේන්තුව පවසන්නේ එවන් අවදානමක් නොමැති බවය.

ඒ සම්බන්ධයෙන් අදහස් දැක්වූ කෘෂිකර්ම දෙපාර්තමේන්තුවේ අධ්‍යක්ෂ ජනරාල්,  පී.මාලතී මහත්මිය,

"අස්වැන්න අඩුවීම ගැන අපි තක්සේරු කළා. ඒ අනුව අපිට රිපෝට් එක හම්බුණා. මහ කන්නයෙන් මෙට්‍රික් ටොන් මිලියන 2.3ක ඇස්වැන්නක් ලැබිලා කියලා. ඒ වී අස්වැන්න ඇත්තටම මාස 7කට ඇති වෙයි. මේ අවුරුද්දේ අපිට හාල් හිඟයක් එන්නේ නැහැ."