සරත් ෆොන්සේකා මහතා වෙනුවෙන් තමන් ඇතුළු භික්ෂූන් වහන්සේලා සිය නමක් ජීවිතාන්තය දක්වා බරපතල වැඩ සහිතව සිරබත් කන්නට සූදානම් බව පූජ්ය මාදුළුවාවේ සෝභිත හිමියන් පවසයි.
ශ්රී මහා බෝධිය,දළදා මාළිගාව ආදී පූජනීය ස්ථාන වලට බෝම්බ ප්රහාර එල්ල කළ ,බෞද්ධ භික්ෂූන් වහන්සේලා දහස් ගණනින් ඝාතනය කළ කරුණා අම්මාන්,කේ.පී ආදීන් සැප විඳිද්දී රටට සාමය උදා කළ සරත් ෆොන්සේකා මහතා සිරගත කිරීම කිසිසේත්ම පිළිගත නොහැකි බව උන්වහන්සේ කියා සිටියේය.
ෆොන්සේකා මහතා බෙලෙක් කෝප්පයෙන් වතුර බිබී වැලිකඩ සිරගෙදර අපාදුක් විඳීම කිසිවෙකුත් අනුමත නොකරන බවද උන්වහන්සේ පෙන්වා දුන්නේ අද කොළඹ පැවති මාධ්ය හමුවකට සහභාගී වෙමිනි.
එක්සත් ජාතීන්ගේ 65 වන සැසිවාරය අමතන්නට නිව්යෝර්ක් බලා ගොස් සිටි ජනාධිපතිවරයා ආපසු පැමිණ යුද අධිකරණ තීන්දුවට අත්සන් නොකරනු ඇතැයි සියලුදෙනා පාහේ බලාපොරොත්තු වුවද එකී බලාපොරොත්තු සුන් කරමින් ජනාධිපතිවරයා එම තීන්දුව අනුමත කළ බවත්,එසේ වුවද ජනාධිපතිවරයාගේ එකී තීන්දුවෙන් මුළු රටම කම්පා වූ බවද සෝභිත හිමියන් සඳහන් කළේය.
යම් හෙයකින් ජනාධිපතිවරයා එකී තීන්දුවට අත්සන් නොකළේ නම් එතුමාගේ කීර්තිය වඩාත් වර්ධනය වන්නට ඉඩ තිබුණු බවත්,කෙසේ නමුත් අවාසනාවකට ජනාධිපතිවරයා එය අත්සන් කළ බවත් උන්වහන්සේ පෙන්වා දුන්නේය.
සමාව ගන්නේ නම් නිදහස ලබාදිය හැකි බවට ජනාධිපතිවරයා මීට පෙර අවස්ථාව සඳහන් කළ බව සිහිපත් කළ උන්වහන්සේ නොකළ වරදකට ෆොන්සේකා මහතා කිසිසේත්ම සමාව නොඉල්ලන බවද සෝභිත හිමියන් පෙන්වා දුන්නේය. ෆොන්සේකා මහතා සිරබත් කමින් අපාදුක් විඳ සිරගෙදරදීම මැරුණත් කිසි විටකත් සමාවක් නො ඉල්ලන බව පූජ්ය මාදුළුවාවේ සෝභිත හිමියන් වැඩිදුරටත් කියා සිටියේය.
