පළමු යුද අධිකරණ තීන්දුව තමන් කිසිසේත්ම පිළිනොගන්නා බව හිටපු යුද හමුදාපති,ප්රජාතන්ත්රවාදී ජාතික සන්ධානයේ නායක,පාර්ලිමේන්තු මන්ත්රී සරත් ෆොන්සේකා මහතා පවසයි. අද පාර්ලිමේන්තු සංකීර්ණයේ පැවති මාධ්ය හමුවකට එක්වෙමින් හෙතෙම මේ බව කියා සිටියේය.
රටේ ඉහළින්ම සිටින පුද්ගලයාට ඕන විදිහට නීතිය හැසිරෙන බවත්,ඒ නිසාම තමන්ටද නීතියේ පිළිසරණ අපේකෂා කළද නොලැබෙන බවත් ඔහු කියා සිටියේය.
අවුරුදු 40 ක රාජ්ය සේවය වෙනුවෙන් ලැබෙන විශ්රාම වැටුප පවා අහිමි කරලීමට ආණ්ඩුව කටයුතු කර ඇති බවත් රජයේ සේවකයෙකු වූ තමාට එරෙහිව එසේ කටයුතු කිරීමට ආණ්ඩුවට අයිතියක් නැති බවත් ෆොන්සේකා මහතා සඳහන් කළේය.
තමන් යුද හමුදාපතිවරයාව සිටි කාලයේ හාරදහස් ගණනක් යුද අධිකරණයට ඉදිරිපත් කළ බවට සිහිපත් කරවන ඇතැමුන්ගේ ප්රකාශ මුළුමනින්ම විහිළු සහගත බවද ඔහු පෙන්වා දුන්නේ ඒ සියලුදෙනා ගේ ගණනට තමන්ට දඬුවම් කරලීම සිදුවිය යුතු බවත්, එය මොළේ කොලොප්පං කෙනෙකු මිස සිහිබුද්ධිමත් කිසිවෙකුත් විශ්වාස නොකරන බවත්ය.
එක්සත් ජාතික පක්ෂයට එක්වන ලෙස ලැබෙන ඇරියුම් පිළිබඳ මාධ්යවේදියෙකු නැඟූ ප්රශ්නයකට පිළිතුරු දෙමින් ෆොන්සේකා මහතා කියා සිටියේ තමන්ටද ප්රතිපත්තියක් ඇති නිසා යූ.ඇන්.පියේ ප්රතිපත්ති තමන්ගේ ප්රතිපත්ති සමග සැසඳෙන තත්ත්වයක් නිර්මාණය වුවහොත් එම පක්ෂයට එක්වීම පිළිබඳ සලකා බැලිය හැකි බවය.
