'මම නැවත ඩකා නුවරට යනවා' - බංග්ලාදේශ හිටපු අගමැති ෂෙයික් හසීනා කියයි

මානව වර්ගයාට එරෙහිව සිදුකළ අපරාධ සම්බන්ධයෙන් තමන්ට මරණ දණ්ඩනය නියම වී තිබුණ ද, "මෙම වසර තුළදී" නැවත සිය රට බලා පැමිණෙන බව බංග්ලාදේශයේ හිටපු අග්‍රාමාත්‍ය ෂෙයික් හසීනා ප්‍රකාශ කර තිබේ.

ඇය මේ බව සඳහන් කර ඇත්තේ අද (28) පැවති විශේෂ මාධ්‍ය සාකච්ඡාවකදීය.

දැනට 78 වැනි වියේ පසුවන ෂෙයික් හසීනා, ඇයගේ වසර 15ක දැඩි පාලනයට එරෙහිව සිසුන් මෙහෙයවූ දැවැන්ත ජනතා නැගිටීමක් හමුවේ 2024 අගෝස්තු මාසයේදී අසල්වැසි ඉන්දියාවට පලා ගියාය.

ඉන් අනතුරුව, පසුගිය ජනවාරි මාසයේදී නව දිල්ලියේ පැවති මාධ්‍ය හමුවක් ඇමතීම හැරුණු විට ඇය ප්‍රසිද්ධියේ පෙනී සිට නැත.

ඉන්දීය මාධ්‍ය නාලිකාව සමඟ පැවැති සම්මුඛ සාකච්ඡාවකදී හසීනා කියා සිටියේ තමන් මරණයට බිය නොවන බවත්, තමන්ට එරෙහිව ලබා දී ඇති අධිකරණ තීන්දුව "නීති විරෝධී, ව්‍යවස්ථා විරෝධී සහ දේශපාලන අරමුණු මත පදනම් වූවක්" බවත්ය.

"මට එරෙහිව කුමන්ත්‍රණ රාශියක් දියත් වුණා. නමුත් ඒ හැම කුමන්ත්‍රණ ජාලයක්ම බිඳ දමමින් ජනතා ඡන්දයෙන් පස් වතාවක්ම මම අගමැති ලෙස තේරී පත් වුණා. රටේ පෙර නොවු විරූ සංවර්ධනයක් වෙනුවෙන් මම වැඩ කළා. මට පැහැදිලිව කියන්න අවශ්‍යයි, සෑම බාධකයක්ම සහ කුමන්ත්‍රණයක්ම පරාජය කරමින් මම මේ වසරේ මගේ රටට ආපසු යනවා." මරණ දණ්ඩනය හමුවේ වුවද නැවත රටට යන්නේදැයි නැඟූ ප්‍රශ්නයට පිළිතුරු දෙමින් ෂෙයික් හසීනා මේ බව පවසා තිබේ.

පසුගිය නොවැම්බර් මාසයේදී ඩකා නුවර අධිකරණයක් විසින්, ප්‍රචණ්ඩත්වයට අනුබල දීම, ඝාතනය කිරීමට අණ දීම සහ සාහසික ක්‍රියා වැළැක්වීමට පියවර නොගැනීම සම්බන්ධයෙන් ෂෙයික් හසීනා වැරදිකාරිය කරමින් ඇයව එල්ලා මැරීමට නියෝග කළේය. එමෙන්ම ඇය නායකත්වය දුන්, එරට වඩාත්ම ජනප්‍රිය පක්ෂයක් වූ "අවාමි ලීගය" ද මේ වන විට තහනම් කර ඇත.

මිලියන 170ක ජනගහනයක් වෙසෙන බංග්ලාදේශයේ පසුගිය පෙබරවාරි මාසයේ පැවැති මැතිවරණයෙන් අග්‍රාමාත්‍ය තාරික් රහ්මාන් විශිෂ්ට ජයක් ලැබීමෙන් පසු ඉන්දියාව සහ බංග්ලාදේශය අතර සබඳතා යහපත් වී තිබේ. කෙසේ වෙතත්, ෂෙයික් හසීනාව තමන් වෙත භාර දෙන ලෙස බංග්ලාදේශය දිගින් දිගටම ඉල්ලා සිටීම හේතුවෙන් දෙරට අතර යම් රාජ්‍යතාන්ත්‍රික නොසන්සුන්තාවයක් තවමත් පවතින බව සඳහන් වේ.