ජාතිවාදය වැපිරූ යුගය අවසන්, සියලු ජාතීන් එකමුතු විය යුතුයි - ඇමති විජිත

පටු දේශපාලන අරමුණු වෙනුවෙන් ජාතිවාදය සහ ආගම්වාදය නිර්මාණය කර රට අසමගියට පත් කළ අතීත යුගය මේ වන විට නිමා වී ඇති බවත්, සියලු ජාතීන්ට එකට ජීවත් විය හැකි විනයගරුක හා ශිෂ්ට සම්පන්න සමාජයක් ගොඩනැගීමට නව රජය කැපවී සිටින බවත් විදේශ කටයුතු, විදේශ රැකියා සහ සංචාරක අමාත්‍ය විජිත හේරත් මහතා ප්‍රකාශ කළේය.

අමාත්‍යවරයා මේ බව සඳහන් කළේ අද (28) කොළඹ නෙලුම් කුලුන පරිශ්‍රයේදී පැවැති සමස්ත ලංකා මුස්ලිම් තරුණ සංගමයේ (YMMA) 76 වැනි සංවත්සර මහා සභාවට ප්‍රධාන ආරාධිත අමුත්තා ලෙස එක්වෙමිනි.

එහිදී වැඩිදුරටත් අදහස් දැක්වූ අමාත්‍යවරයා, පසුගිය කාලසීමාව තුළ රටේ ආර්ථිකය කඩා වැටී බංකොලොත් වූ ආකාරය සහ යුද්ධයෙන් පසුව ලැබුණු ජාතික සමගිය සඳහා වූ ස්වර්ණමය අවස්ථාව පවා පටු දේශපාලන අරමුණු වෙනුවෙන් ජාතිවාදය සහ ආගම්වාදය වැපිරීම හරහා අසාර්ථක කරගත් ආකාරය සිහිපත් කළේය.

කෙසේ වෙතත්, 2024 වසරෙන් පසු එවැනි ජාතිවාදී හෝ ආගම්වාදී ගැටුම්වලට රටේ ඉඩක් නොමැති බව අවධාරණය කළ අමාත්‍යවරයා, රටේ ආර්ථිකය, විනය සහ නීතිය යළි ගොඩනැගීමට නම් සිංහල, දෙමළ, මුස්ලිම්, බර්ගර් සහ මැලේ යන සියලු ජාතීන් එකමුතුව කටයුතු කිරීම අනිවාර්ය බව පෙන්වා දුන්නේය.

"මුස්ලිම් වුණත්, සිංහල වුණත් අප සියලු දෙනාම මනුස්සයෝ. අප අතර කිසිදු වෙනසක් නැහැ. භාෂා, ආගම් හෝ කුල භේදයකින් තොරව අප සියලු දෙනාම එකම මවකගේ දරුවන් මෙන් එකමුතුව සිටිය යුතුයි," යැයි විජිත හේරත් මහතා පැවසීය.

එමෙන්ම, වසර 70කට අධික කාලයක් මුළුල්ලේ සමස්ත ලංකා මුස්ලිම් තරුණ සංගමය රටේ සියලුම ජාතිකත්වයන් වෙනුවෙන් ඉටුකළ සමාජ සුභසාධන කාර්යභාරය ද අමාත්‍යවරයාගේ ඇගයීමට ලක් විය. 

විශේෂයෙන්ම මෑතකදී ඇති වූ ගංවතුර සහ සුළි සුළං ආපදා අවස්ථාවලදී, දකුණේ සිට පැමිණි මුස්ලිම් තරුණ ස්වේච්ඡා කණ්ඩායම්, තමන් නන්නාදුනන දුෂ්කර ප්‍රදේශවලට ගොස් සිදු කළ සහන සේවා කටයුතු තුළින් ඉස්ලාම් දහම උගන්වන සහෝදරත්වය සමාජයට ප්‍රායෝගිකවම ඔප්පු කර ඇති බවද ඔහු සිහිපත් කළේය.