මේ වසරේ ගතවූ කාල සීමාව තුළ ඩෙංගු රෝගීන් 35,228ක් - මරණ 20යි
June 5, 2026 12:36 pm
මේ වසරේ ගතවූ කාල සීමාව තුළ වාර්තා වූ ඩෙංගු රෝගීන්ගේ සංඛ්යාව 35,228 දක්වා ඉහළ ගොස් ඇති බව ජාතික ඩෙංගු මර්දන ඒකකයේ අධ්යක්ෂ වෛද්ය කපිල කන්නංගර මහතා පවසයි.
දෙරණ බිග් ෆෝකස් වැඩසටහනට එක්වෙමින් ඔහු ප්රකාශ කළේ, මෙය පසුගිය වසරට සාපේක්ෂව සියයට 30ත්-40ත් අතර ප්රමාණයක වර්ධනයක් වන බවය.
මේ රෝගීන්ගේ වැඩි ප්රමාණයක් බස්නාහිර පළාතෙන් වාර්තාවී ඇති අතර ඉන් වැඩි සංඛ්යාවක් කොළඹ දිස්ත්රික්කයෙන් හමුවී ඇති බව සඳහන්ය.
දකුණු පළාතේ මාතර සහ ගාල්ල දිස්ත්රික්කවලත්, මධ්යම පළාතේ මහනුවර දිස්ත්රික්කයෙත්, සබරගමුව පළාතේ රත්නපුර දිස්ත්රික්කයෙත්, වැඩිම ඩෙංගු රෝගීන් පිරිසක් හඳුනාගෙන ඇති බව ඩෙංගු මර්දන ඒකකය සඳහන් කරයි.
ඩෙංගු රෝගීන්ගෙන් සියයට 80ක් පමණ වාර්තාවී ඇත්තේ, කොළඹ, ගම්පහ, රත්නපුර, මාතර, ගාල්ල සහ මහනුවර දිස්ත්රික්කවලිනි.
දිට්වා සුළිකුණාටු තත්ත්වයත් සමඟ මෙරට තුළ ඇති වූ අධික වර්ෂාපතනයත්, ඉන් අනතුරුව විටින් විට ලැබුණු වැසි තත්ත්වය හේතුවෙන් ඩෙංගු රෝගීන් වාර්තාවීම ඉහළ ගොස් තිබේ.
මේ අතර අද (05) දිනයේදී තවත් ඩෙංගු මරණයක් සිදුව ඇති බවට තොරතුරු වාර්තාවී ඇති බවත් ඒ සමඟින් මේ වසරේ සමස්ත ඩෙංගු මරණ සංඛ්යාව 20 දක්වා ඉහළ ගොස් ඇති බව ජාතික ඩෙංගු මර්දන ඒකකයේ අධ්යක්ෂ වෛද්ය කපිල කන්නංගර මහතා පැවසුවේය.
මිය ගිය පිරිස අතර පිරිමි පුද්ගලයින් පස් දෙනෙක් සිටින බවත් සෙසු පිරිස කාන්තාවන් වන බවත් ඔහු ප්රකාශ කළේය.
මෙලෙස මිය ගිය පිරිස අතරට ළමුන් තිදෙනෙකු ද ඇතුළත්ව සිටිති.
2025 වසරේදී ඩෙංගු රෝගීන් 29 දෙනෙකු මිය ගොස් ඇති බව ද එහිදී වෛද්ය කපිල කන්නංගර මහතා වැඩිදුරටත් කියාසිටියේ.
