පාසල් ළමුන්ගෙන් සියයට 20ක් මන්දපෝෂණයෙන්
June 4, 2026 06:01 am
මෙරට පාසල් ළමුන්ගෙන් පහෙන් එකකට වැඩි පිරිසක් මන්දපෝෂණයෙන් පෙළෙන බව සෞඛ්ය අමාත්යාංශ ලේකම් විශේෂඥ වෛද්ය අනිල් ජාසිංහ මහතා පවසයි.
ඔහු පෙන්වා දෙන්නේ එම දරුවන් යොවුන් වියට පැමිණීමේ දී ස්ථූල භාවයට පත්වීමේ අවදානම පවතින බවය.
ජාතික පෝෂණ මාසයට සමගාමීව සෞඛ්ය ප්රවර්ධන කාර්යාංශයේ පැවති මාධ්ය හමුවකට එක්වෙමින් විශේෂඥ වෛද්ය අනිල් ජාසිංහ මහතා මෙම අදහස් පළ කළේය.
"වයස අවුරුදු 5ට අඩු දරුවන්, අවුරුදු 5ට වැඩි දරුවන් ගත්තහම මේ සමීක්ෂණයට අනුව, අපේ මන්දපෝෂණය, මිටි බව 10.1%යි. ක්ෂය වී යෑම 8.1%යි. බර අඩුකම 16.1%යි. බර වැඩිකම 0.5%ක් වගේ ඉතා සුළු මට්ටමක. මේකෙන් පේනවා අපේ දරුවන්ගෙන් පහෙන් එකක් පමණ මන්දපෝෂණයෙන් පෙළෙන බව. එවැනි රටක දරුවන් වයසට ගිහින් තරුණ සහ මැදිවියට එනකොට ස්ථුලභාවයට පත්වෙනවා. කුඩා කාලයේ තිබෙන මන්දපෝෂණය පරිවර්ථනය වෙනවා ස්ථූලභාවය කරා. ස්ථූලභාවය වැඩිහිටියන්ගේ කාන්තාවන්ගේ 47%ක් සහ පිරිමින්ගෙන් 30%ක් වෙනවිට කාන්තාවන්ගෙන් 15%ක් හා පිරිමින්ගෙන් 6%ක් බවට පත්වෙනවා."
