දෙරණට සුවිශේෂී සම්මානයක්
December 10, 2024 08:56 pm
අපේ දේ රැකගෙන අලුත් දේ අරගෙන ප්‍රේක්ෂකයින් අතරට යමින් ඔවුන්ගේ දැනුම ආකල්ප හා රසවින්දනය වෙනුවෙන් පුළුල් මෙහෙවරක් ඉටුකරන ටීවී දෙරණ යළිත් සුවිශේෂී සම්මානයකින් පිදුම් ලැබීය.
ඒ, 2024 ස්ලිම් බ්‍රෑන්ඩ් එක්සලන්ස් සම්මාන උලෙළේදීය.
ශ්‍රී ලංකාවේ අලෙවිකරන ආයතනය නොහොත් SLIM සංවිධාන කරන SLIM BRAND EXCELLENCE 2024 සම්මාන ප්‍රදානෝත්සවය පසුගියදා පැවැත්වුණේ ශ්‍රී ජයවර්ධනපුර කෝට්ටේදීය.
මෙරට සන්නාම ඇගයීමට ලක්කෙරෙන ප්‍රමුඛතම සම්මාන උළෙල මෙවර පැවැත්වුණේ 23 වැනි වරටය.
ඒ සඳහා මෙරට ප්‍රමුඛ සන්නාම 200කට අධික සංඛ්‍යාවක් එක්ව සිටි අතර එහිදී කාණ්ඩ කිහිපයක් යටතේ සන්නාම ඇගයීමට ලක්කෙරුණි.
එහිදී දෙරණ, SERVICE BRAND OF THE YEAR නොහොත් වසරේ සේවා සන්නාමය කාණ්ඩයේ විශේෂ ඇගයීම් සම්මානයෙන් පිදුම් ලැබීය.
එය සම්මාන උළෙලේ දී මාධ්‍ය ජාලයකට හිමිවූ එකම සම්මානය වීමද සුවිශේෂත්වයකි.
එදා මෙන් අදත්, අද මෙන් හෙටත් අපේ දේ රැකගෙන අලුත් දේ අරගෙන ඔබට සමීපවෙමින් අපගේ ජාතික මෙහෙවර නොපිරිහෙළා ඉටුකිරීමට අප සූදානම්.
