ශ්‍රී ලංකා කාන්තා ක්‍රිකට් කණ්ඩායමට තවත් ජයක්

ආසියානු කුසලාන විස්සයි විස්ස කාන්තා ක්‍රිකට් තරගාවලියේ තායි කාන්තා ක්‍රිකට් කණ්ඩායමට එරෙහි තරගය ලකුණු 49කින් ජයගැනීමට ශ්‍රී ලංකා කාන්තා ක්‍රිකට් කණ්ඩායම සමත්විය.

එහිදී ප්‍රථමයෙන් පන්දුවට පහරදුන් ශ්‍රී ලංකා කාන්තා ක්‍රිකට් කණ්ඩායම පන්දුවාර 20 අවසානයේ කඩුලු 05ක් දැවී ලකුණු 156ක් රැස්කරගනීමට සමත්වුණි.

ශ්‍රී ලංකාව වෙනුවෙන් අගනා ඉනිමක් ක්‍රීඩා කළ හර්ෂිතා සමරවික්‍රම ලකුණු 81ක් රැස්කරගැනීමට සමත්විය.

හර්ෂිතාගේ ඉනිමට හතරේ පහර 10ක් ඇතුළත් විය.

නිලක්ෂි ද සිල්වා හයේ පහර 2ක් සහ හතරේ පහර 03ක් සමග ලකුණු 39ක් රැස්කරගැනීමට සමත්විය.

පන්දු යැවීමේදී තායි කණ්ඩායම වෙනුවෙන් Thipatcha Putthawong කඩුලු 2ක් දවාගැනීමට සමත්විය.

Nattaya Boochatham සහ Suleeporn Laomi එක් කඩුල්ල බැගින් දවාගැනීමට සමත්විය.

පිළිතුරු ඉනිම ක්‍රීඩා කළ තායි කණ්ඩායම වෙනුවෙන් Chanida Sutthiruang නොදැවී ලකුණු 37ක් රැස්කරගැනීමට සමත්විය.

Nannapat Koncharoenkai ලකුණු 25ක් රැස්කළේය.

කෙසේ වෙතත් ශ්‍රී ලංකා ක්‍රීඩිකාවන්ගේ අගනා පන්දු යැවීම හමුවේ තායි ක්‍රීඩිකාවන්ට පන්දුවාර 20 අවසානයේ කඩුලු 5ක් දැවී රැස්කරගත හැකිවූයේ ලකුණු 107ක් පමණි.

අචිනි කුළසුරිය පන්දුවාර 3ක් යොමුකර ලකුණු 19කට කඩුලු 02ක් දවාගැනීමට සමත්විය.

සුගන්ධිකා කුමාරි, ඉනෝකා රණවීර, කවීෂා දිල්හාරි එක් කඩුල්ල බැගින් දවාගත්තාය.

තරගයේ ක්‍රීඩිකාව වූයේ හර්ෂිතා සමරවික්‍රමයි.

මෙම ජයග්‍රහණයත් සමඟ ශ්‍රී ලංකා කාන්තා විස්සයි විස්ස කණ්ඩායම ආසියානු කුසලාන ප්‍රසාද ලකුණු සටහනේ 3 වන ස්ථානයේ රැඳී සිටී.

එම ප්‍රසාද ලකුණු සටහනේ ප්‍රථම ස්ථානයේ පසුවන්නේ පාකිස්තාන කාන්තා ක්‍රිකට් කණ්ඩායමයි.

එහි දෙවන ස්ථානයේ පසුවන්නේ ඉන්දීය කාන්තා ක්‍රිකට් කණ්ඩායමයි.