මහ දවල් නිවසකට පැන රුපියල් කෝටි දෙකකට ආසන්න රන් භාණ්ඩ සහ මුදල් කොල්ලකයි

කොටහේන බෙනඩික් මාවතේ පිහිටි ව්‍යාපාරිකයකුගේ නිවසකට පැමිණි නාඳුනන පුද්ගලයින් දෙදෙනෙකු නිවසේ සිටි පිරිස බියකර රුපියල් කෝටි දෙකකට ආසන්න රන් භාණ්ඩ සහ මුදල් කොල්ලකා පළාගොස් තිබේ.

පොලීසිය පැවසුවේ කොල්ලකරුවන් ඔවුන් සතුව ගිනිඅවි ඇති බවට නිවසේ සිටි පිරිස බියකර ඇති බවය.

ඊයේ (08) පෙරවරුවේ මෙම කොල්ලකරුවන් දෙදෙනා අදාළ නිවසට පැමිණ ඇති අතර නිවසේ සිටි තරුණියකගේ දෙඅත් බැඳ නිවසේ සාලයට රැගෙනවිත් නිවසේ හිමිකරු සහ ඔහුගේ බිරිඳව බියගන්වා ඇත.

පසුව කොල්ලකරුවන් විසින් ඔවුන්ගේ අල්මාරිවල බහා තිබූ රුපියල් කෝටි එකහමාරකට ආසන්න වටිනාකමකින් යුත් රන් භාණ්ඩ සහ රුපියල් ලක්ෂ පහළොවකට ආසන්න මුදලක් පැහැරගෙන ගොස් තිබේ.

පොලීසිය පැවසුවේ කොල්ලකරුවන් පළායාමට පෙර, ව්‍යාපාරික අඹුසැමි යුවළ කාමරයකට දමා එහි දොර වසා නිවසේ ප්‍රධාන දොරටුවට ද අගුලු දමා ඇති බවය.