ව්‍යාජ මැණික් ජාවාරමක් හසුවෙයි
July 5, 2022 03:25 pm
ව්‍යාජ මැණික් ගල් වෙළෙඳුන්ට ලබාදී මුදල් ඉපයු ජාවාරම්කරුවෙකු ඇඹිලිපිටිය පොලීසිය විසින් අත්අඩංගුවට ගෙන තිබේ.
අදාළ පුද්ගලයා සතුව තිබී මැණික් ලෙස සකසන ලද ගල් තොගයක්, මැණික් පරීක්ෂා කිරීමට යොදාගන්නා උපකරණ සහ ජංගම දුරකථනයක් ද පොලිස්භාරයට ගෙන ඇත.
එලෙස අත්අඩංගුවට ගත් සැකකරු ජනක මංජුසාර නමැති ඇඹිලිපිටිය, මොරකැටිය ප්‍රදේශයේ පදිංචි පුද්ගලයෙකි.
එම පුද්ගලයා විසින් සමාජ මාධ්‍යජාල සහ වෙබ් පිටුවක් ඔස්සේ එම කූඨ ව්‍යාපාරය පවත්වාගෙන ගොස් ඇති බව පොලීසිය පැවසීය.
මෙම සැකකරු විසින් පළමු ගනුදෙනුවේදී වටිනා මැණික් ගල් ලබාදී ඉන් අනතුරුව සිදුකරන ගනුදෙනුවලදී ව්‍යාජ මැණික් ගල් අලෙවි කර ව්‍යාපාරිකයින් රවටා මුදල් උපයා තිබේ.
සැකකරු විසින් දිගු කලක් තිස්සේ මෙම කූඨ ව්‍යාපාරය සිදුකර ඇති බව පොලීසිය සිදුකළ ප්‍රශ්න කිරීම්වලදී අනාවරණය වී ඇත.
අත්අඩංගුවට ගත් සැකකරු ඇඹිලිපිටිය මහෙස්ත්‍රාත් අධිකරණය වෙත ඉදිරිපත් කිරීමට නියමිතය.
