සයුරෙන් එතෙර
මිනිසාට සම වෙන සීල් මත්ස්‍යයින්
June 24, 2019 10:49 am
සීල් මත්ස්‍යයින්ගේ භාෂා හැකියාව පිළිබඳව සුවිශේෂී පර්යේෂණයක් ලොවට දායාද කිරීමට ස්කොට්ලන්ත පර්යේෂකයින් පිරිසක් සමත් වී තිබේ.
දියුණු මොළයක් ඇති මිනිසාට පවා විදේශීය භාෂාවක් ඉගෙනීම එතරම් පහසු කටයුත්තක් වන්නේ නැහැ.
එහෙත් වෙනත් ජීවී වර්ගයක භාෂාව හඳුනාගැනීමට තරම් විශිෂ්ඨ හැකියාවක් සීල් මත්ස්‍යයන් සතුයි.
මිනිසුන්ට සමාන අයුරින් එකම නිෂ්පාදන යාන්ත්‍රණයක් භාවිත කර කථනය සහ ගීත අනුකරණය කිරීමේ විශේෂ දක්ෂතාවක් අළු පැහැ සීල් මත්ස්‍යයින් සතු බව ස්කොට්ලන්තයේ ඇන්ඩෘ සරසවියේ පර්යේෂකයින් පිරිසක් සොයාගෙන තිබේ.
මෙම පර්යේෂණය සඳහා සීල් මත්ස්‍යයින් තිදෙනෙක් යොදාගෙන තිබේ.
වාචික ඉගෙනීමේ පරිණාමය පිළිබඳ වඩා හොඳ අවබෝධයක් ලබාදෙමින් කථන ආබාධ අධ්‍යයනය කිරීම සඳහා නව ආකෘතියක් ලෙස මෙම අධ්‍යයනය යොදාගත හැකි බව පර්යේෂකයින් පවසයි.
සෝලා , ගැන්ඩොල්ෆ් සහ ජැනිස් මෙම අධ්‍යයනයට භාජන වූ සීල් මත්ස්‍යයින් තිදෙනායි.
පළමුව එම සතුන්ට පොදු සීල් ශබ්ද අනුකරණය කිරීමට පුහුණුව ලබා දී පසුව ක්‍රමයෙන් මිනිසාගේ කථනය අනුකරණය කිරීමට පුහුණුව ලබා දී තිබේ.
ස්කොට්ලන්ත විශ්වවිද්‍යාලය මීට පෙරත් සීල් මත්ස්‍යයින්ගේ භාෂා හැකියාව පිළිබඳව අගනා පර්යේෂණ ලොවට දායාද කළේය.
මිනිසාගේ හඬ අනුකරණය කිරීමට සීල් මත්ස්‍යයන් සතුව ඇති මෙම හැකියාවත් අගය කළ යුතු මට්ටමක පවතින බව ඔවුන් සිය අධ්‍යයනයෙන් පෙන්වා දී තිබේ.
