සද්ද නැතුව කරපු හොර වැඩක්

හැටන් පොලිස් වසමට අයත් යුනිෆිල්ඩ් වත්තේ වගා ඉඩමක විශාල පරිසර හානියක් සිදු කරමින් විශාල වලවල් හාරා අනවසරෙන් මැණික් ගරමින් සිටි ජාවාරම්කරුවන් පස්දෙනෙක් සැකපිට අද (31) අලුයම අත්අඩංගුවට ගත් බව හැටන් පොලීසිය පවසයි.

අත්අඩංගුවට ගත් සැකකරුවන් එම වතුයායේ වතු නිවාසයක සිට භුගතව අනවසරෙන් විදුලි බලය ලබාගෙන පිටතට ශබ්දය නොඇසෙන සේ විදුලියෙන් ක්‍රියාකරන ජලය ඉසින වතුර මොටරයක්ද යොදාගෙන මෙම මැණික් ගැරිම සිදු කර ඇති බව මෙම වැටලිම සිදු කල හැටන් පොලීසියේ අපරාධ විමර්ෂණ අංශයේ ස්ථානාධිපතිවරයා කියා සිටියේය.

වගා ඉඩමේ විශාල පරිසර හානියක් සිදු කරමින් මෙම ජාවාරම්කරුවන් පිරිස කාලයක් තිස්සේ එම ස්ථානයේ අනවසරෙන් මැණික් ගැරිම සිදු කර ඇති බව පොලීසිය පැවසීය.

අනවසරෙන් මැණික් ගැරිමට උපයෝගි කර ගත් උපකරණ රැසක්ද පොලිස් භාරයට ගෙන ඇති අතර අත්අඩංගුවට ගත් සැකකරුවන් අතර සිටි ප්‍රධාන ඡාවාරම්කරුට අයත් යතුරුපැදියක් ද මැණික් ගැරු ස්ථානයේ තිබී පොලිස් බාරයට ගෙන තිබේ.

අත්අඩංගුවට ගත් සැකකරුවන් හැටන් මහෙස්ත්‍රාත් අධිකරණයට ඉදිරිපත් කිරිමට නියමිතයි.