වැස්ස අඩුවුණත් නායයෑම් අවදානම වැඩියි

දිවයිනට බලපෑ අධික වර්ෂාව සහිත කාලගුණය මේ වනවිට ක්‍රමානුකූලව අඩුවෙමින් පැවතියත්, නායයෑමේ තර්ජනය ක්‍රමානුකූලව වැඩිවන ස්වභාවයක් පෙන්නුම් කරන බව ජාතික ගොඩනැගිලි පර්යේෂණ සංවිධානය පවසයි.

එහි නායයෑම් පර්යේෂණ අංශයේ අධ්‍යක්ෂක ගාමිණී ජයතිස්ස මහතා පවසා සිටියේ, පස සංතෘප්ත වී උපරිම මට්ටමට පැමිණ ඇති හෙයින් මෙලෙස නායයෑම් අවදානම වැඩිවීමේ සම්බාවිතාවක් තිබෙන බවය.

ඒ අනුව වර්ෂාව අඩු වී හොඳින් හිරු එළිය වැටී දින 3ක් යනතුරුත්වත් බෑවුම්වල ජීවත්වූ ජනතාව එහි නිවාසවලට නොයන ලෙස හෙතෙම පැවසීය.

එම නිවාස පස්කඳු කඩාවැටීම්, නායයෑම්, ගල් පෙරළීම්, ගිලාබැසීම් වැනි අවදානම් තත්ත්වයන්හි පසුවන බව ඔහු පෙන්වා දුන්නනේය.

මෙහිදී ගාමිණී ජයතිස්ස මහතා වැඩිදුරටත් පවසා සිටියේ, නායයෑම් අනතුරු නැරඹීමට යෑම ඉතා භයානක බවය.

"නායයෑම් සිදු වූ ප්‍රදේශවලට පහළින් තමයි මාර්ග තියෙන්නේ. ඒ නිසා ඉහළින් සිදුවන නායයෑම්වලට ලක්වීමේ අවදානමක් තියෙනවා. මෙවර එවැනි සිසුවීම් රැසක් සිදුව තිබෙනවා. 

වර්ෂාව අඩුවෙලා හිරු එළිය වැටී පොළොව සම්පූර්ණයෙන් වේලෙන තුරු මේ අවදානම තිබෙනවා" යනුවෙන් හෙතෙම පැවසීය.