අයිස් මත්ද්‍රව්‍ය නිෂ්පාදනය කළ බවට සැක නිවසක් හම්බන්තොට මයුරපුරෙන් හමුවේ
September 15, 2025 12:55 pm
කෙහෙල්බද්දර පද්මේ හා කුඩු නිලංග මෙරට තුළ අයිස් මත්ද්‍රව්‍ය නිෂ්පාදනය කළැයි සැකකෙරෙන තවත් නිවසක් හම්බන්තොට මයුරපුර ප්‍රදේශයෙන් සොයා ගැනීමට කළුතර දිසා අපරාධ කොට්ඨාසය සමත් වී තිබේ.
මෙම නිවස පිළිබඳ අනාවරණය වී ඇත්තේ කුඩු නිලංගගේ සමීපතමයෙකු වන ඇඹිලිපිටිය සුරංග නැමැත්තා කළුතර දිසා අපරාධ කොට්ඨාසයේ අත්අඩංගුවට පත්වීමෙන් පසු කළ හෙළිදරව්වකට අනුවය.
වැල්ලවාය කිරියගොල්ල ප්‍රදේශයේ පදිංචි 20 හැවිරිදි සම්පත් බණ්ඩාර නම් අයෙකු පිළිබඳ ඔහු හෙළිකර තිබූ අතර පානදුර අරුක්ගොඩදී අයිස් මත්ද්‍රව්‍ය සමඟ එම සැකකරු අත්අඩංගුවට ගෙන තිබුණි.
අයිස් මත්ද්‍රව්‍ය නිෂ්පාදනය කළ බවට සැකකෙරෙන මයුරපුර නිවස පිළිබඳ සැකකරු හෙළිකර ඇති අතර එහි අයිස් මත්ද්‍රව්‍ය නිෂ්පාදනය කරන අවස්ථාවේ තමන් එහි රැඳී සිටි බවත් සැකකරු පොලීසියට පවසා තිබේ.
ඉරාන ජාතිකයන් තිදෙනෙක් මෙම නිවසේ අයිස් මත්ද්‍රව්‍ය නිෂ්පාදනය කළ බවත් පසුව අයිස් මත්ද්‍රව්‍ය කිලෝ 14ක් පමණ කෙහෙල්බද්දර පද්මේගේ පාර්ශ්වයට විකුණු බවත් සැකකරු පවසා ඇතැයි වාර්තා වේ.
එම ඉරාන ජාතිකයන් තිදෙනා මේ වනවිට රටින් පලාගොස් ඇතැයි ද සැකකරු පවසා ඇත.
නිවස පරික්ෂා කළ අවස්ථාවේ එහි තීබි අයිස් මත්ද්‍රව්‍ය සෑදීමට යොදාගන්නේ යැයි සැකකෙරෙන රසායනික ද්‍රව්‍ය ලීටර් 52ක් හමුවී ඇති බව පොලිසිය පැවසුවේය.
එහි එක් කාමරයක් විද්‍යාගාරයක් සේ සකස් කර තිබී ඇති අතර එහි තීබි සොයාගත් ද්‍රව්‍ය අතරට මත්ද්‍රව්‍ය සැකසීමට භාවිත කළැයි සැකකෙරෙන සුදු යකඩ කල්දේරම් 04ක්, ප්ලාස්ටික් බකට් 06ක් සහ තවත් භාණ්ඩ කිහිපයක් ද අයත් වේ.
නිපදවූ අයිස් මත්ද්‍රව්‍ය ප්‍රවාහනය කළ බවට සැකකෙරෙන මෝටර් රථයක්ද පොලිස් භාරයට ගෙන ඇති අතර එය විදේශගතව සිටින සංවිධානාත්මක අපරාධකරුවකුගේ නමට ලියාපදිංචි කර ඇති බවත් එය මීට පෙරද පොලිස් නිලධාරියෙක් මත්ද්‍රව්‍ය ප්‍රවාහනය කරමින් සිටියදී පොලිස් භාරයට ගෙන පසුව මුදාහැරුණු මෝටර් රථයක් බවත් විමර්ශනවලදී හෙළි වී ඇත.
සැකකරු පානදුර මහේස්ත්‍රාත් අධිකරණයට අද ඉදිරිපත් කිරීමට නියමිත අතර වැඩිදුර විමර්ශන කළුතර දිසා අපරාධ කොට්ඨාසය විසින් ක්‍රියාත්මකය.
කෙහෙල්බද්දර පද්මේ හා කුඩු නිලංග මෙරට තුළ අයිස් මත්ද්‍රව්‍ය නිෂ්පාදනය කිරීමට භාවිත කරන බව කියන රසායනික ද්‍රව්‍ය කිලෝග්‍රෑම් 50,000ක් පමණ බස්නාහිර උතුර අපරාධ කොට්ඨාසය මිද්දෙණිය ප්‍රදේශයෙන් පසුගිය සැප්තැම්බර් 06 වනදා සොයා ගැනුණි.
එහි සාම්පල පරික්ෂා කළ අන්තරායකර ඖෂධ පාලක ජාතික මණ්ඩලය සඳහන් කළේ ලබාගත් සාම්පල 20න් 17කම අයිස් මත්ද්‍රව්‍ය සෑදීමට යොදාගන්නා රසායනික ද්‍රව්‍ය ඇතැයි තහවුරු වූ බවය.
