පද්මේ ඇතුළු පිරිස තැන් දෙකක - පැය 72ක රැඳවුම් නියෝග
August 31, 2025 05:04 pm
ඉන්දුනීසියාවේ ජාකර්තා නුවරදී අත්අඩංගුවටට ගෙන මෙරටට රැගෙන ආ ප්‍රබල සංවිධානාත්මක අපරාධකරුවන් පස්දෙනා ස්ථාන දෙකක රඳවාගෙන ප්‍රශ්න කිරීම් සිදු කරනු ලබන බව පොලිස් මූලස්ථානය පැවසීය.
අපරාධ පරීක්ෂණ දෙපාර්තමේන්තුවේ සහ බස්නාහිර පළාත උතුර අපරාධ කොට්ඨාසයේ රඳවාගෙන ඔවුන්ගෙන් ප්‍රශ්න කරීම් සිදු කරන බව සඳහන් වෙයි.
ත්‍රස්තවාදය වැළැක්වීමේ පනත යටතේ ඔවුන් සම්බන්ධයෙන් පැය 72ක රැඳවුම් නියෝග මත ප්‍රශ්න කිරීම් සිදුකරන බව පොලීසිය සඳහන් කළේය.
ඉන්දුනීසියානු පොලිසිය, ජාත්‍යන්තර පොලිසිය හා ශ්‍රී ලංකා පොලිසිය ඉන්දුනීසියාවේ සිදුකළ ඒකාබද්ධ මෙහෙයුමකින් පසු කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග, බැකෝ සමන් හා තැඹිලි ලහිරු යන සංවිධානාත්මක අපරාධකරුවන් පිරිස පසුගියදා අත්අඩංගුවට ගනු තිබුණි.
අදාළ මෙහෙයුම හා සම්බන්ධ වූ ඉන්දුනීසියානු හා මෙරට පොලිස් නිලධාරීන් කණ්ඩායම එම අපරාධකරුවන් පිරිස ඊයේ රාත්‍රියේ මෙරටට රැගෙන ඒමට පියවර ගෙන ගත්තේය.
දිවයිනට රැගෙන ඒමෙන් අනතුරුව කෙහෙල්බද්දර පද්මේ, කමාන්ඩෝ සලින්ත, පානදුරේ නිලංග යන තිදෙනා ඉදිරි විමර්ශන සඳහා අපරාධ පරීක්ෂණ දෙපාර්තමේන්තුව වෙත භාරදී ඇති අතර බැකෝ සමන් හා තැඹිලි ලහිරු යන අය භාරදී ඇත්තේ කොළඹ උතුර අපරාධ කොට්ඨාශය වෙතයි.
මෙම සංවිධානාත්මක අපරාධකරුවන් අත්අඩංගුවට ගැනීමේ මෙහෙයුමට සම්බන්ධ වූ ඉන්දුනීසියානු හා මෙරට පොලිස් නිලධාරීන් ඇගයීමට ද මහජන ආරක්ෂක අමාත්‍යංශය පියවර ගෙන ඇත.
ඊයේ අදාළ අපරාධකරුවන් රැගෙන දිවයිනට පැමිණි එම නිලධාරීන් පිරිස ගුවන්තොටුපලේ දී පිළිගත් මහජන ආරක්ෂක අමාත්‍ය ආනන්ද විජේපාල මහතා ඔවුන් ඇගයීමට ලක් කරමින් සමරු ඵලක හා ත්‍යාග පිරිනැමූ බවයි පොලිස් මූලස්ථානය සඳහන් කළේය.
මේ අතර ඊයේ ගුවන්තොටුපලේ මෙම ඇගයීම් කටයුතු සිදුවන අවස්ථාව සම්බන්ධයෙන් ව්‍යාජ ඡායාරූප සහ ප්‍රවෘත්තීන් සමාජ මාධ්‍ය තුළ සංසරණය වන බව මහජන ආරක්ෂක අමාත්‍යංශය පවසයි.
එම අමාත්‍යංශය පෙන්වාදෙන්නේ අමාත්‍ය ආනන්ද විජේපාල මහතා යැයි හැඟෙන පරිදි ව්‍යාජ ලෙස සකස් කරන ලද ඡායාරූපයක් සමාජ මාධ්‍ය තුළ සංසරණය වෙමින් පවතින බවය.
කෙසේවෙතත් එම ඡායාරූපය හා ප්‍රවෘත්තීන් තරයේ ප්‍රතික්ෂේප කරන අතර ඒවා ව්‍යජ ලෙස සකස් කර පළ කරන පුද්ගලයින්ට එරෙහිව නෛතික ක්‍රියාමාර්ග ගැනීමට බලාපොරොත්තු වන බව මහජන ආරක්ෂක අමාත්‍යංශය වැඩිදුරටත් සඳහන් කළේය.
