සමුහ සංක්‍රමණවලට එරෙහිව ඔස්ට්‍රේලියාවේ විරෝධතා
August 31, 2025 04:51 pm
සමුහ සංක්‍රමණවලට එරෙහි දැවැන්ත විරෝධතා මාලාවක් ඔස්ට්‍රේලියාවේ ප්‍රධාන නගර කිහිපයකදී අද (31) පැවැත්විය.
එහිදී හටගත් කලහකාරි තත්ත්වයක් පාලනය කිරීමට පොලීසිය ද මැදිහත් වී තිබුණි.
ඔස්ට්‍රේලියාව තුළ වෙසෙන සෑම දෙදෙනෙකුගෙන්ම එක්අයෙකු විදේශයක උපත ලද හෝ ඔහුගේ හෝ ඇයගේ මව්පියන්ගෙන් එක් අයෙකු හෝ විදේශයක උපත ලද අයෙකු වේ.
මෙලෙස ඉහළ සංක්‍රමණික පිරිසක් රටතුළ සිටීම ඔස්ට්‍රේලියාව තුළ ඇතිවී තිබෙන ප්‍රධාන ගැටලුවකි.
එවන් පසුබිමක මෙම සමුහ සංක්‍රමණවලට විරෝධය පලකරමින් 'මාච් ෆෝ ඔස්ට්‍රේලියා' නමින් දැවැන්ත රැළි මාලාවක් අද පැවැත්වුණේ එරට සිඩ්නි ඇතුළු ප්‍රධාන නගර කිහිපයකදීය.
මෙම විරෝධතා සඳහා ඔස්ට්‍රේලියානු පුරවැසියන් දහස් ගණනක් සහභාගී වී තිබුණි.
එරට තුළ සමූහ සංක්‍රමණ පාලනය කිරීමට පියවර ගන්නා ලෙස ඔවුන් ඔස්ට්‍රේලියානු රජයට බලකර සිටියි.
කෙසේ වෙතත් ඔස්ට්‍රේලියානු රජය මෙම විරෝධතා මගින් වෛරය පතුරුවන බවට ප්‍රකාශ කරමින් එම විරෝධතා හෙළා දැක තිබේ.
මේ අතර මෙම විරෝධතා වලට එරෙහි විරෝධතා මාලාවක් ද අද එරට තුළ දියත් කර තිබුණි.
ඒ හේතුවෙන් මෙල්බර්න් ඇතුළු නගර කිහිපයක දී මෙම දෙපාර්ශ්වය අතර ගැටුම් ද හටගත් බව වාර්තා වේ.
එහිදී තත්ත්වය පාලනය කිරීමට පොලීසිය මැදිහත් වී තිබුණි.
ඔවුන් විරෝධතාකරුවන් දෙසට ගම්මිරිස් ද්‍රාවණය ඉස පිරිස විසිරුවා හැරීමට කටයුතු කළ අතර කිහිපදෙනෙකු අත් අඩංගුවට ද ගෙන තිබේ.
