ජාතික ගගන නාවික සෙවීම් සහ මුදවා ගැනීම් කමිටු රැස්වීම අද
May 21, 2025 07:21 pm
ජාතික ගගන නාවික සෙවීම් සහ මුදවා ගැනීම් කමිටු රැස්වීම අද (21) බත්තරමුල්ල පිහිටි මඟනැගුම - මහ මැදුර සංකීර්ණයේදී පවත්වා තිබේ.
එම කමිටුවේ සම සභාපතිත්වය දරණ ආරක්‍ෂක ලේකම් එයාර් වයිස් මාර්ෂල් සම්පත් තුයියකොන්තා (විශ්‍රාමික) ද ඊට සහාභාගී වී ඇත.
එක්සත් ජාතීන්ගේ සාගර නීතිය පිළිබඳ සම්මුතියට (UNCLOS) සහ ජාත්‍යන්තර සිවිල් ගුවන් සේවා පිළිබඳ චිකාගෝ සම්මුතියට (Chicago Convention) අනුකූලව, ශ්‍රී ලංකාවට අයත් වන දේශ සීමා කලාපයන්, දේශ සීමා මුහුදු කලාපයන් සහ විවෘත මුහුදු කලාපවලින් සැදුම්ලත් සෙවීම සහ මුදවා ගැනීම් කලාපය (SRR) තුළ, ගගන නාවික සහ සමුද්‍රිය සෙවීම් සහ මුදවා ගැනීම සම්බන්ධීකරණය සහ සේවා සැපයීමේ වගකීම පැවරෙනු ඇත.
සෙවීම් සහ මුදවා ගැනීම සන්නිවේදනය, වෛද්‍ය ආධාර සේවා, කාර්යක්‍ෂම ආපදා අනතුරු ඇඟවීම් සිදු කිරීම සහ ජාතිකත්වය හෝ තත්වය නොසලකා ආපදාවට ලක්වන ඕනෑම පුද්ගලයෙකුට උපකාර කිරීම ඇතුළුව, අදාළ කලාප තුළ ඵලදායී, ප්‍රමාණවත් සහ මූලික සෙවීම් සහ මුදවා ගැනීම සම්බන්ධීකරණය සහතික කිරීම, සෙවීම සහ මුදවා ගැනීම් කලාප පිහිටුවීම තුලින් බලාපොරොත්තු වේ.
ඒ අනුව, 2023 අගෝස්තු 28 දින අංක 2347 - 02 දරණ අති විශේෂ ගැසට් පත්‍රය මගින් ප්‍රකාශිත පරිදි ජාතික ගගන නාවික සෙවීම් සහ මුදවා ගැනීම් කමිටුව පිහිටුවන ලද අතර, එහි ප්‍රධාන අරමුණ වන්නේ ශ්‍රී ලංකාවේ ජාතික ගගන නාවික සෙවීම් සහ මුදවා ගැනීම් පද්ධතිය සඳහා උපාය මාර්ගික සම්බන්ධීකරණය, මග පෙන්වීම සහ නායකත්වය සැපයීමයි.
මෙම කමිටුව මගින් ගගන නාවික සෙවීම් සහ මුදවා ගැනීම සිදුවීමකදී හෝ එවැනි අවස්ථාවක් රහිත වන විට අවම වශයෙන් වසරකට වරක් රැස්වීම් පැවැත්වීම අනිවාර්ය වේ.
ආරක්‍ෂක අමාත්‍යාංශයේ ලේකම්වරයා සහ වරාය, නාවික සහ ගුවන් සේවා අමාත්‍යාංශයේ ලේකම්වරයා, ජාතික ගගන නාවික සෙවීම් සහ මුදවා ගැනීම් කමිටුවෙහි (NASC) සම සභාපතිත්වය දරනු ලබයි.
ත්‍රිවිධ හමුදාපතිවරුන් ඇතුළු ජ්‍යෙෂ්ඨ හමුදා නිලධාරීන් මෙන්ම, රාජ්‍ය ආයතන රැසක් නියෝජනය කරමින් විශේෂයෙන් වරාය, නාවික හා ගුවන් සේවා අමාත්‍යාංශයේ ලේකම්, සිවිල් ගුවන් සේවා අධිකාරියේ අධ්‍යක්‍ෂ ජනරාල්, ගුවන් තොටුපළ සහ ගුවන් සේවා (ශ්‍රී ලංකා) (පුද්ගලික) සමාගමේ සභාපති, ආපදා කළමනාකරණ මධ්‍යස්ථානයේ අධ්‍යක්‍ෂ ජනරාල්, පොලිස් අපරාධ හා රථවාහන අංශයේ ජ්‍යෙෂ්ඨ නියෝජ්‍ය පොලිස් අධිකාරී සහ ගුවන් තොටුපළ හා ගුවන් සේවා ආශ්‍රිත ක්‍ෂේත්‍රයන්හී ජ්‍යෙෂ්ඨ නිලධාරීන් ගණනාවක් ඇතුළු සම්භාවනීය අමුත්තන් රැසක් ආරක්‍ෂක ලේකම්වරයා සමඟ මෙම සාකච්ඡාවට සහභාගී වූහ.
