ට්‍රම්ප්ගේ තීරුබදු ප්‍රතිපත්තියෙන් ලංකාවට විය හැකි හානිය
April 9, 2025 04:19 pm
ආසියානු සංවර්ධන බැංකුවේ (ADB) ප්‍රමුඛ ආර්ථික ප්‍රකාශනය වන 2025 අප්‍රේල් මාසයේ ආසියානු සංවර්ධන දැක්ම (ADO) ප්‍රකාශයට පත්කිරීම දැනුම්දීම සඳහා අද (09) පෙරවරුවේ කොළඹදී මාධ්‍ය හමුවක් පැවැත්විණි.
එහිදී ආසියානු සංවර්ධන බැංකු නිලධාරීන් කියා සිටියේ 2024 වසරේදී ශ්‍රී ලංකා ආර්ථිකය අත්පත් කරගත් ශක්තිමත් ප්‍රකෘතිමත් වීමෙන් පසු, 2025 වසරේ දී 3.9%ක හා 2026 වසරේ දී 3.4% ක මධ්‍යස්ථ වර්ධනයක් අත්පත් කරගනු ඇති බවට පුරෝකථනය කරන බවය.
මේ අතර එක්සත් ජනපද ජනාධිපති ඩොනල්ඩ් ට්‍රම්ප් විසින් පසුගියදා පනවන ලද නවතම ආනයන තීරුබදු හේතුවෙන් ශ්‍රී ලංකාවට විය හැකි බලපෑම පිළිබඳව මෙහිදී විශේෂයෙන් අවධානය යොමු විය.
එක්සත් ජනපද තීරුබදු ප්‍රතිපත්තිය පූර්ණ වශයෙන් ක්‍රියාත්මක වුවහොත්, තමන් විසින් ශ්‍රී ලංකාවේ ආර්ථික වර්ධනය සම්බන්ධයෙන් කර ඇති වර්ධන පුරෝකථනයන් පහළ දැමීමට සිදුවනු ඇති බව ආසියානු සංවර්ධන බැංකුව මෙහිදී අවධාරණය කර සිටී.
භාණ්ඩ අපනයනයේ දැවැන්ත පහළ යාමක් වාර්තා වීම, අපනයන අභිමුඛ කර්මාන්ත අංශය මන්දගාමී වීම, ආයෝජක විශ්වාසය පහළ වැටීම හේතුවෙන් සෘජු විදෙස් ආයෝජන ගලාඒම හා දේශීය ප්‍රාග්ධන ප්‍රසාරණය පහළ යාම, රැකියා වියුක්තිය ඉහළ යාම, වැටුප් වර්ධක පහළ යාම, පුද්ගලික පරිභෝජනය පහළ යාම, ඉහළ රැකියා වියුක්තිය හා ආඩු බදු ආදයම නිසා රාජ්‍ය මූල්‍යයට එල්ලවිය හැකි පීඩනය යනාදිය, අමෙරිකානු තීරුබදු ප්‍රතිපත්තිය හේතුවෙන් ශ්‍රී ලංකාවට අත්විඳීමට සිදුවිය හැකි අහිතකර ප්‍රතිඵල ලෙස ආසියානු සංවර්ධන බැංකුව සඳහන් කරයි.
තවද ඔවුන් සඳහන් කරන්නේ ඇණවුම් අවලංගු වීම් හමුවේ අඩු තීරුබදු අනුපාතයන් පනවා ඇති මැලේසියාව, ඉන්දියාව හා මෙක්සිකෝව වැනි රටවලට අදාළ ඇණවුම් විතැන්වීමට ඉඩක් ඇති බවය.
