අවුරුද්දට ගමේ යන අයට විශේෂ දැනුම්දීමක්

සිංහල හා දෙමළ අලුත් අවුරුද්ද වෙනුවෙන් ගම්බිම් බලා පිටත්ව යන මගීන් සඳහා ඒකාබද්ධ ප්‍රවාහන සැලැස්මක් දුම්රිය දෙපාර්තමේන්තුව සහ ගමනාගමන කොමිෂන් සභාව විසින් සකස් කර තිබේ.

ප්‍රවාහන හා මහාමාර්ග අමාත්‍යංශයේ මඟ පෙන්වීම පරිදි ලබන 09 වනදා සිට 21 වන දින දක්වා මෙම ඒකාබද්ධ ප්‍රවාහන සැළැස්ම සකස් කර ඇති බව ජාතික ගමනාගමන කොමිෂන් සභාව සඳහන් කළේය.

ඒ අනුව අවුරුදු කාලසීමාව තුළ මහනුවර, පුත්තලම, හයිලෙවල්/ලෝලෙවල්, දඹුල්ල හා ගාල්ල යන ප්‍රධාන කොරිඩෝ 05 කේන්ද්‍ර කර ගනිමින් ගමනාගමන මණ්ඩලය සහ ගමනාගමන කොමිෂන් සභාව මගින් දුරගමන් බස් රථ සේවා ක්‍රියාත්මක කරනු ලබයි.

ස්ථීර කාලසටහන්වල ධාවනය වන බස් රථවලට අමතරව අතිරේක ගමන්වාර 500ක් ධාවනය කිරීමට සැළැසුම් කර තිබේ.

එමෙන්ම දුම්රිය දෙපාර්තමේන්තුව විසින් ද කොටුව දුම්රිය ස්ථානයේ සිට බදුල්ල, මහනුවර හා ගාල්ල යන ගමනාන්තවලට සාමාන්‍ය ගමන්වාරවලට අතිරේකව විශේෂ දුම්රිය සේවා යොදවා ඇති බව ජාතික ගමනාගමන කොමිෂන් සභාව සඳහන් කළේය.

මාකුඹුර, කඩවත, කඩුවෙල හා බැස්ටියන් මාවත කේන්ද්‍රකර ගනිමින් අධිවේගී මාර්ගය හරහා ගාල්ල, මාතර, බදුල්ල, තංගල්ල, කතරගම යන ප්‍රදේශ සඳහා මගී සේවා සැපයීමට අතිරේක බස් රථ 350ක් යෙදවීමට ද කටයුතු සැළසුම් කර තිබේ.

මෙම කාලසීමාව තුළ ගම්බිම් බලා යාමට කොළඹ සහ තදාසන්න නගර ආශ්‍රිත බස් නැවතුම්පොළවලට මගීන් ලක්ෂ 08කට ආසන්න සංඛ්‍යාවක් පැමි‍ණෙනු ඇතැයි අපේක්ෂා කරන බව ජාතික ගමනාගමන කොමිෂන් සභාව සඳහන් කළේය.

මගීන්ට අවශ්‍ය සනීපාරක්ෂක පහසුකම්, ආරක්ෂාව මෙන්ම ප්‍රථමාධාර ද අදාළ බස් රථ පර්යන්තවලට සපයා ඇති අතර විශේෂ රාජකාරි සඳහා නිලධාරීන් ද  යොදවා තිබේ.

ලංකා ගමනාගමන මණ්ඩලයේ බස්රථ සම්බන්ධයෙන් විස්තර 1958 සහ දුම්රිය සම්බන්ධ විමසීම් 1971 යන දුරකතනවලට ඇමතීමෙන් ලබාගත හැකි වෙයි.