මියන්මාරය සටන් විරාමයක් ප්‍රකාශයට පත්කරයි

මියන්මාර හමුදා පාලනය විසින් එරට සන්නද්ධ කණ්ඩායම්වලට එරෙහිව ක්‍රියාත්මක කර තිබෙන සිවිල් යුද්ධය මේ මස 22වනදා දක්වා තාවකාලිකව අත්හිටුවීමට තීරණය කර ඇත.

එරට රාජ්‍ය රූපවාහිනිය හරහා ඔවුන් මෙම තීරණය ප්‍රකාශයට පත්කර තිබේ.

හමුදාවේ ඉහළ අණදෙන නිලධාරියෙකු සිදුකළ ප්‍රකාශයක් උපුටා දක්වමින් අදාළ රූපවාහිනී නිවේදනයේ දක්වා ඇත්තේ, එරටට බලපෑ භූමිකම්පාවෙන් විපතට පත් ජනතාවවට අවශ්‍ය පහසුකම් සැලසීමේ අරමුණින් මෙම තීරණය ගත් බවයි.

ඒ අනුව මෙම කාලසීමාව තුළ සන්නද්ධ කණ්ඩායම් විසින් හමුදා කඳවුරුවලට පහරදීමෙන් වැළකී සිටිය යුතුය.

තවද සංවිධානය කිරීම, හමුදාව රැස්කිරීම හෝ භූමි ප්‍රදේශය පුළුල් කිරීම නොකළ යුතු බවත් එහි දැක්වේ.

ඒ අනුව අදාළ සන්නද්ධ කණ්ඩායම් එම කොන්දේසි අනුගමනය නොකරන්නේ නම්, හමුදාව ඊට අවශ්‍ය පියවර ගන්නා බව නිවේදනයේ වැඩිදුරටත් සඳහන්ව ඇත.

ඉකුත් සිකුරාදා (28) මියන්මාරයට බලපෑ මෙම භූමිකම්පාවෙන් දින පහකට පසු ඔවුන් මෙම තීරණය ප්‍රකාශයට පත්කිරීම විශේෂත්වයක්ය.

මෙම භූමිකම්පාව හේතුවෙන් අද දිනය වනවිට එරට තුළ පමණක් මියගිය සංඛ්‍යාව 2,886 දක්වා ඉහළ ගොස් තිබූ අතර, තවත් 4,639 දෙනෙකු තුවාල ලබා සිටියි.

කෙසේ නමුත් මරණ සංඛ්‍යාව තවත් ඉහළ යා හැකි බව වාර්තා වේ.