උප්පැන්න සහතිකවල මුල් පිටපත් ඇතුළත් ප්‍රතික්ෂේප කළ නාමයෝජනා යළිත් භාරගැනීමට නියෝගයක්
April 2, 2025 12:39 pm
පළාත් පාලන මැතිවරණය සඳහා භාරදී ප්‍රතික්ෂේප කෙරුණු නාමයෝජනා අතරින් උප්පැන්න සහතිකවල මුල් පිටපත් ඇතුළත් නාම යෝජනා පත්‍ර යළි භාරගන්නා ලෙස අභියාචනාධිකරණය නියම කළේය.
උප්පැන්න සහතිකවල මුල් පිටපත් සහිත නාම යෝජනා පත්‍ර යළි භාරගැනීමට සම්බන්ධයෙන් අධිකරණය හමුවේ එකඟතාවයක් ඇතිවීමෙන් අනතුරුව මෙම නියෝගය නිකුත් කෙරුණි.
ඊට අමතරව මෙසේ භාර ගැනීමට නියෝග කෙරුණු නාම යෝජනා පත්‍ර හැර සෙසු නාම යෝජනා ප්‍රතික්ෂේප කිරීම්වලට අදාළ නඩුවලට පාදක වන පළාත් පාලන ආයතන සඳහා ඡන්ද විමසීම පත්වීමේ කටයුතු හෙට (03) දින තෙක් අත්හිටුවන ලෙසත් අධිකරණය විසින් නියෝග කරනු ලැබීය.
අදාළ නාමයෝජනා පත්‍ර ප්‍රතික්ෂේප කිරීමට එරෙහිව ගොනුකර තිබූ පෙත්සම් 30 ක් පමණ අද යළි සලකා බැලූ අවස්ථාවේදී අභියාචනාධිකරණයේ සභාපති විනිසුරු මොහොමඩ් ලෆාර් තාහීර් සහ කේ.පී. ප්‍රනාන්දු යන මහත්වරුන්ගෙන් සමන්විත අභියාචනාධිකරණ විනිසුරු මඩුල්ල විසින් මෙම නියෝගය නිකුත් කළේය.
එහෙත් සෙසු කාරණා මත ප්‍රතික්ෂේප කෙරුණු නාමයෝජනා යළි භාරගැනීමට ඇති හැකියාව සම්බන්ධයෙන් වගඋත්තරකරුවන්ගෙන් උපදෙස් ලබාගෙන හෙට දින අධිකරණය හමුවේ කරුණු දක්වන ලෙසත් විනිසුරු මඩුල්ල විසින් නීතිපතිවරයාට නියම කළේය.
මෙම පෙත්සම් අද කැඳවූ අවස්ථාවේදී සිය නාම යෝජනා ප්‍රතික්ෂේප කිරීමට එරෙහිව සර්වජන බලය පක්ෂය වෙනුවෙන් ජනාධිපති නීතිඥ අලී සබ්රි, පොදුජන එක්සත් පෙරමුණ වෙනුවෙන් ජනාධිපති නීතීඥ ෆයිසර් මුස්තාපා, සමගි ජන බලවේගය වෙනුවෙන් ෆර්මාන් කාසිම් සහ ස්වාධීන කණ්ඩායම් විසින් ඉදිරිපත් කර තිබූ ප්‍රතික්ෂේප කළ නාමයෝජනා පත්‍ර වෙනුවෙන් නීතිඥවරු පිරිසක් කරුණු ඉදිරිපත් කරනු ලැබීය.
එම නීතිඥවරු අධිකරණය හමුවේ කරුණු දක්වමින් පොදුවේ කියා සිටියේ, තම නාමයෝජනා ප්‍රතික්ෂේප කිරීමට තේරීම් බාර නිලධාරීන් ගැන ලැබූ තීරණය නීතිවිරෝධි බවය.
ඉදිරිපත් වූ සියලු කරුණු සලකා බලු අධිකරණය අනතුරුව මෙම නියෝග නිකුත් කළේය.
