මන්නාරමේ ද්විත්ව ඝාතනය සම්බන්ධයෙන් සැකකරුවන් 4ක් අත්අඩංගුවට
January 20, 2025 02:00 pm
මන්නාරම, අධිකරණය සංකීර්ණය අසලදී වෙඩිතබා සිදුකළ ද්විත්ව ඝාතනය සම්බන්ධයෙන් සැකකරුවන් සිව්දෙනෙකු අත්අඩංගුවට ගෙන තිබේ.
ඒ අතර ප්‍රධාන වෙඩික්කරු සහ ඔහුව ප්‍රවාහනය කළ ත්‍රී රෝද රථයේ රියදුරු ද සිටින බව වාර්තා වේ.
මීට අමරව අනෙක් සැකකරුවන් දෙදෙනා අතර මීටපෙර අඩම්පන් ප්‍රදේශයේ දී වෙඩිතබා සිදුකළ ද්විත්ව ඝාතනයට සම්බන්ධ ප්‍රධාන සැකකරුද සිටින බව සඳහන් වේ.
මන්නාරම, අධිකරණය සංකීර්ණය අසලදී පසුගිය 16 වනදා සිදුකළ වෙඩිතැබීමෙන් කාන්තාවක් ඇතුළු පුද්ගලයින් සිව්දෙනෙකු තුවාල ලබා තිබූ අතර ඉන් දෙදෙනෙකු මන්නාරම රෝහලට ඇතුළත් කිරීමේදී මියගොස් තිබුණි.
වෙඩි ප්‍රහාරයට ලක්වී ඇත්තේ මන්නාරම, උයිලන්කුලම ප්‍රදේශයේ සිදුවු ඝාතන සිද්ධීන් දෙකකට අදාළ නඩුවක් සඳහා පෙනීසිටීමට මන්නාරම අධිකරණයට පැමිණි පිරිසකි.
යතුරුපැදියකින් පැමිණි පුද්ගලයින් දෙදෙනෙකු විසින් මෙම වෙඩිතැබීම සිදුකර පලාගොස් තිබුණි.
උයිලන්කුලම ප්‍රදේශයේ දෙපිරිසක් අතර දීර්ඝ කාලයක සිට ගැටුමක් පවතින බවත් 2022 වසරේ දී ඝාතන දෙකක්, 2023 වසරේ දී ඝාතන 2ක් සිදුවී ඇති බවත් වාර්තා වෙයි.
2022.06.10 වන දින උයිලන්කුලම ප්‍රදේශයේදී තිරික්කල් තරගයක් පවත්වා ඇති අතර එහිදී ඇතිවූ සිද්ධියක් මුල් කරගෙන සහෝදරයින් දෙදෙනෙක් වෙඩිතබා ඝාතනය කර තිබුණි.
එම සිද්ධියට අදාළ නඩු විභාගය පසුගිය 16වනදා මන්නාරම අධිකරණයේදී පැවැත්වීමට නියමිතව තිබූ අතර එම අවස්ථාවේදී මෙම ද්විත්ව ඝාතනය සිදුකර තිබුණි.
