බණ්ඩාරගම ප්‍රදේශයේ තරුණයෙකු අතුරුදන්

බණ්ඩාරගම ප්‍රදේශයේ පදිංචිව සිටි තරුණයෙකු අතුරුදන්ව ඇතැයි පොලීසිය පවසයි.

මෙලෙස අතුරුදන්ව ඇත්තේ බණ්ඩාරගම බැල්ලන්තුඩාව ශ්‍රී ශ්‍රී ඤාණරතන මාවත ප්‍රදේශයේ පදිංචි චානුක ගිම්හාර පෙරේරා නම් 21 හැවිරිදි තරුණයෙකි.

ඔහු මොරටුව, කටුබැද්ද ජර්මානු කාර්මික අභ්‍යාස විද්‍යාලයේ පාඨමාලාවක් හදාරමින් සිටි අයෙකි.

තරුණයන්ගේ මව්පියන් පවසන පරිදි සිය පුත්‍රයා සුපුරුදු පරිදි ඔවුන් සමග ඊයේ (24) රාත්‍රි ආහාරය ද ගෙන නින්දට ගොස් ඇති බවයි.

අද අලුයම 4.30ට පමණ මව ආහාර පිසීම සඳහා මුළුතැන්ගෙට යන අවස්ථාවේදී නිවසේ ප්‍රධාන දොර අඩක් විවෘත කර තිබෙණු දැක ඇති අතර දොර වසා ඇය සිය දරුවන් දෙදෙනා බැලීමට නිදන කාමරය අසලට යන විට චානුක එහි සිට නැත.

සිය නිවුන් සොයුරා සමඟ එකම ඇඳෙහි නිදා ගන්නා චානුකගේ සොයුරා වන හේශාන් ද මේ පිළිබඳව කිසිවක් දැන සිට නොමැති බව සදහන් වේ.

පසුව ප්‍රදේශවාසීන්ගේ සහාය ඇතිව ප්‍රදේශය පුරා චානුක සොයා සෝදිසි මෙහෙයුම් ආරම්භ කළත් කිසිඳු හෝඩුවාවක් දැනගැනීමට නොහැකි වී තිබේ. 

පසුව මව්පියන් හොරණ පොලීසියට ඒ පිළිබඳව පැමිණිල්ලක් ද සිදු කර තිබේ.

එහිදී පොලීසියේ බෘෘනෝ නිල සුනඛයා යොදා සෝදිසි මෙහෙයුම් ආරම්භ කෙරුණි.

සිද්ධිය සම්බන්ධයෙන් මිල්ලනිය පොලීසිය වැඩිදුර විමර්ශන සිදුකරයි.