මහ දවාලේ හෝමාගම ටවුමේ සිදුකළ රන් භාණ්ඩ කොල්ලය

හෝමාගම නගරයේ පිහිටි රන් භාණ්ඩ ආයතනයක් වෙත පිස්තෝලයක් අතැතිව ආ නාඳුනන පුද්ගලයින් දෙදෙනෙකු විසින් එම ආයතනයේ තිබූ මුදල් හා රන් භාණ්ඩ කොල්ලකා පළා ගොස් තිබේ.

අද (10) පෙරවරු 11.45ට පමණ මෙම සිදුවීම වාර්තා වී ඇති අතර, එහිදී යතුරුපැදි දෙකකින් පැමිණි සිව්දෙනෙකු අතරින් දෙදෙනෙක් අලෙවි සැලට ඇතුළු වන අයුරු එහි තිබූ CCTV කැමරාවේ සටහන්ව තිබිණි.

ඔවුන් දෙදෙනා රන් භාණ්ඩ මිලදී ගන්නා මුවාවෙන් මඳ වේලාවක් එහි රැඳී සිටින අතර, පසුව එක් අයෙක් අලෙවිසැලේ සේවකයන්ට පිස්තෝලයක් පෙන්වා රන් භාණ්ඩ හා මුදල් කොල්ලකයි.

මුදලින් රුපියල් ලක්ෂ 3ක්, මුදු 36ක් හා පෙන්ඩන්ට් 48ක් කොල්ලකරුවන් රැගෙන ගොස් ඇති බව ස්වර්ණාභරණ අලෙවිසැලේ සේවකයින් පවසයි.

කොල්ලකරුවන් පිටව යාමත් සමඟ අලෙවිසැලේ සේවකයෙක් හදිසි අසනීප තත්ත්වයකට ලක්වන ආකාරයත් CCTV කැමරාවේ සටහන්ව තිබිණි.

කොල්ලකරුවන් රැගෙන ගිය රන් මුදු හා පෙන්ඩන්ට් මාර්ගයේ වැටී තිබියදී ඒ අසලින් ගමන් ගත් පිරිස් ඒවා යළි අලෙවිසැල වෙත ගෙනැවිත් දුන අයුරුද එම CCTV දර්ශනවල දක්නට ලැබේ.

හෝමාගම පොලිසියේ නිලධාරීන් වහාම එහි පැමිණ විමර්ශන ආරම්භ කළ අතර කොල්ලකරුවන් පැමිණි යතුරුපැදිවල අංක තහඩු ව්‍යාජ බව හෙළි වී තිබේ.