ජනපති සහ බැසිල් අතර තවත් හමුවක්

ජනාධිපති රනිල් වික්‍රමසිංහ මහතා සහ ශ්‍රී ලංකා පොදුජන පෙරමුණේ නිර්මාතෘ හිටපු අමාත්‍ය බැසිල් රාජපක්ෂ මහතා අතර තවත් සාකච්ඡාවක් අද (04) පැවැත්වීමට නියමිතව තිබේ.

අද පස්වරුවේ ජනාධිපතිවරයාගේ නිල නිවසේදී මෙම සාකච්ඡාව පැවැත්වෙනු ඇති බව වාර්තා වෙයි.

මෙහිදී පසුගිය මැයි දිනය පිළිබඳව මෙන්ම වත්මන් දේශපාලන තත්ත්වය පිළිබඳව ද සාකච්ඡා කිරීමට නියමිත බව සඳහන්ය.

ජනාධිපතිවරයාට සහාය දක්වන ප්‍රධානතම පාර්ශ්වය වන ශ්‍රී ලංකා පොදුජන පෙරමුණ අතර සාකච්ඡා පසුගිය දා ආරම්භ කෙරුණු අතර ඒ පිළිබඳව දේශපාලන කේෂ්ත්‍රයේ වැඩි අවධානයට ලක් වුණි.

බැසිල් රාජපක්ෂ මහතා විසින් මෙම සාකච්ඡාවේ දී ප්‍රථමයෙන් මහ මැතිවරණය පැවැත්වීමට යෝජනා කිරීමත් සමග මෙම අවධානය තවදුරටත් ඉහළ ගොස් තිබුණි.