තහනම් කළ කුඩු නෝනිගේ දේපොළ

වසර 30ක පමණ කාලයක සිට අහුංගල්ල ප්‍රදේශයේ  මත්ද්‍රව්‍ය ජාවාරමේ නිරත වූ බවට සැක කෙරෙන අනෝමා ශාන්ති නොහොත් කුඩු නෝනි නමැත්තියට අයත් රුපියල් ලක්ෂ 1,103කට අධික වටිනාකමකින් යුත් වාහන සහ දේපොළ රැසක් අද (29) තහනම් කෙරුණි.

ඒ නීතිවිරෝධී වත්කම් විමර්ශන කොට්ඨාසය මගිනි.

ගාල්ල ධීවර වරායේ නවතා තිබූ බහුදින ධීවර යාත්‍රා දෙකක් අපරාධ පරීක්ෂණ දෙපාර්තමේන්තුවේ නීතිවිරෝධී වත්කම් විමර්ශන කොට්ඨාසය විසින් තහනම් කර එයද සිය භාරයට ගනු ලැබීය.

ඒ එම යාත්‍රා, වසර 30කට ආසන්න කාලයක් අහුංගල්ල ප්‍රදේශයේ මත්ද්‍රව්‍ය ජාවාරමේ නිරත වී ඇති බවට සැකකෙරෙන එම කාන්තාව මත්ද්‍රව්‍ය අලෙවියෙන් උපයාගත් මුදලින් මිලදීගත් ඒවා බව හෙළිවීමෙන් පසුව ය.

ඇය එම යාත්‍රා සිය ඥාතීන්ගේ නමට මිලදී ගෙන ඇති බව පොලීසිය පවසයි.

මෙම බහුදින ධීවර යාත්‍රා නිරීක්ෂණය කිරීම සඳහා පොලිස්පති දේශබන්දු තෙන්නකෝන් මහතා ගාල්ල ධීවර වරාය වෙත අද පෙරවරුවේ පැමිණියේය.

මේ අතර මෙම සැකකාරියට අයත් අහුංගල්ල ප්‍රදේශයේ පිහිටි නිවාස 03ක්, කඩ කාමරයක් හා ඉඩම් 05 ක් ද නීතිවිරෝධී වත්කම් විමර්ශන කොට්ඨාසය මගින් සිය භාරයට ගත් අතර එම දේපොළ නිරීක්ෂණයට ද පොලිස්පතිවරයා එක් විය.

එමෙන්ම සැකකාරියට අයත්ව තිබී පොලිස් භාරයට ගැනුණු ලොරි රථයක්, යතුරුපැදි දෙකක්, බැකෝ යන්ත්‍රයක්, වෑන් රථයක්, ත්‍රිරෝද රථ දෙකක්ද පොලිස්පතිවරයා අද නිරීක්ෂණය කළේය.

මේ අතර සැකකාරිය සීනිගම පිහිටි පෞද්ගලික ආයතනයකට රුපියල් ලක්ෂ 52ක් ගෙවා නිෂ්පාදනය කරවමින් තිබූ බහුදින ධීවර යාත්‍රාවක්ද නීතිවිරෝධී වත්කම් විමර්ශන කොට්ඨාසය අද සිය භාර ගත්තේය.

ඒ අනුව කුඩු නෝනිට අයත්ව තිබී, නීතිවිරෝධී වත්කම්  විමර්ශන කොට්ඨාසය මගින් අද තහනම් කෙරුණු දේපළවල මුළු වටිනාකම රුපියල් ලක්ෂ 1,103කට අධික බව පොලීසිය පැවසුවේය.

සැකකාර කුඩු නෝනි සහ ඇගේ ඥාතීන් ඇතුළු හයදෙනෙකු මෙම දේපොළ සම්බන්ධයෙන් මේ වනවිට අත්අඩංගුවේ පසුවන බව පොලීසිය සඳහන් කළේය.