මන්ත්‍රීවරුන්ගේ හැසිරීම ගැන නීතිඥයින්ගෙන් පොලිස්පතිට පැමිණිල්ලක්?

පාර්ලිමේන්තුව තුළ මහජන නියෝජිතයින්ගේ හැසීරිම  සම්බන්ධයෙන්  නීතිඥවරුන් එක්ව පොලිස්පතිවරයාට පැමිණිල්ලක් සිදුකරන බව නීතිඥ සුනිල් වටගල මහතා පවසයි.

ප්‍රජාතන්ත්‍රවාදය සඳහා නීතිඥයෝ යන නමින් කොළඹ පැවැති මාධ්‍ය හමුවකට එක්වෙමින් ඒ මහතා මේ අදහස් පළ කළේය.
 
පාර්ලිමේන්තුව තුළ පසුගිය දා ඇති වු තත්ත්වය හේතුවෙන් මෙතෙක් පැමිණිල්ලක් ඉදිරිපත්ව නොමැති බවත්, එවැන්නක් ඉදිරිපත් වේදැයි නීතිඥයෝ වශයෙන් බලා සිටින බව ද සුනිල් වටගල මහතා මෙහිදී කියා සිටියේය.

පාර්ලිමේන්තුවේ සිටින මන්ත්‍රීන්ගේ අධ්‍යාපන සුදුසුකම් බැලිය යුතු බවත්, ජනතාවට ද ඉදිරියේ දී මහජන නියෝජිතයින් පාර්ලිමේන්තුවට පත් කිරීමේ දී කුමන ආකාරයේ නිර්දේශයන් ගත යුතු ද යන්න පිළිබඳ සොයා බැලීමට වගකීමක් ඇති බව ද වටගල මහතා පැවසීය.

කෙසේ වෙතත් කථානායකවරයාගේ පුටුවට වතුර වත්කරමින් මන්ත්‍රීවරුන් හැසිරුණ ආකාරය ගැන ඉදිරියේ දී පියවරක් ගැනීමට බලාපොරොත්තු වන බව ද ඔහු වැඩිදුරටත් කියා සිටියේය.