මෙහෙණින් වහන්සේව එළවා දමන්න ආරාමයට මිනී ඔළුවක් ගෙනත් දාලා  

කැලණිය, නුංගමුගොඩ පිහිටි ආරාමයක දොර ඉදිරිපිට මිනී ඔළුවක් ගෙනැවිත් තැබූ සිද්ධියක් සම්බන්ධයෙන් පොලීසිය විසින් විමර්ශනයක් ආරම්භ කර තිබේ.

එහි වැඩසිටින මෙහෙණින් වහන්සේ එළවා දැමීමේ අරමුණින් මෙය සිදුකර ඇති බවට අනාවරණය වී ඇත.

එම මෙහෙණින් වහන්සේ පසුගිය 26 වෙනිදා භාවනා වැඩසටහනකට අනුරාධපුරයට වැඩම කොට නැවත ආරාමයට වැඩම කර අවස්ථාවේ දී ආරාමයේ දොර ඉදිරිපිට මිනී ඔළුවක් තිබෙන අයුරු දැක ඒ පිළිබඳ පෑලියගොඩ මූලස්ථාන පොලීසියට පැමිණිලි කර තිබේ.

ඒ අනුව එම ස්ථානයේ ආරක්ෂාවට පොලිස් නිලධාරින් යොදවා තිබූ අතර ඊයේ (27) පස්වරුවේ කොළඹ අලුත්කඩේ අංක පහ වැඩබලන මහෙස්ත්‍රාත් ශ්‍රියාන් පුංචිහේවා මහතා ස්ථානීය පරීක්ෂණය සිදුකළේය. 

එහි තිබූ මිනී ඔළුව පොලිස් භාරයට ගැනීමෙන් අනතුරුව මෙහෙණින් වහන්සේට ආරාමය තුළට යාමට අවසර ලබාදී ඇත.

මීට පෙර මෙම ආරාමයේ වැඩ සිටි මෙහෙණින් වහන්සේ අපවත් වීමෙන් අනතුරුව මෙම සිදුවීමට මුහුණදුන් මෙහෙණින් වහන්සේ 2024 වර්ෂයේ සිට එහි වැඩසිටින බව සඳහන්ය.

මෙම ප්‍රදේශයේම හිමිනමක් විසින් මෙලෙස මිනී ඔළුවක් ආරාමයේ දොර ඉදිරිපිට තබන්නට ඇති බවට මෙහෙණින් වහන්සේ චෝදනා කරයි.

සිද්ධිය සිදුවූ බව කියන 26 වෙනිදා පෙරවරුවේ එම හිමියන් විසින් මෙම ස්ථානයට ත්‍රීරෝද රථයකින් පැමිණ ආපසු යන අයුරු ප්‍රදේශවාසීන් දැක තිබේ.

මිනී ඔළුව ගෙනවිත් දැමූ බවට පැවසෙන හිමියන් විසින් ආරාමයේ සිටවා තිබූ බෝධීන් වහන්සේ විනාශ කර නාමපුවරුවද කඩා දැමූ බවට චෝදනා එල්ලවී ඇත.

මෙම සිද්ධීන් සම්බන්ධයෙන් පෑලියගොඩ මූලස්ථානය විසින් පුළුල් විමර්ශනයක් ආරම්භ කර තිබේ.