ශ්‍රී පාද වන්දනා සමය අවසන් වෙයි

මෙවර ශ්‍රී පාද වන්දනා සමය ඊයේ (30) මධ්‍යම රාත්‍රියෙන් අවසන් වී තිබේ.

ශ්‍රී පාදස්ථානාධිපති පූජ්‍ය බෙංගමුවේ ධම්මදින්න හිමි සඳහන් කළේ, වෙසක් පොහෝ දිනය නිමිත්තෙන් ශ්‍රී පාද උඩ මළුවේ ආගමික වැඩසටහන් රැසක් ද සංවිධානය කර තිබු බවය.

ශ්‍රී පාද උඩ මළුවේ පැවති ආගමික වතාවත්වලින් අනතුරුව උඩ මළුවේ තැන්පත් කර ඇති සධාතුක කරඩුව, සමන් දේව ප්‍රතිමාව හා දේව ආභරණ මාර්ග 4ක් ඔස්සේ පැල්මඩුල්ල, ගල්පොත්තාවල ශ්‍රී පාද රජමහා විහාරස්ථානය දක්වා පෙරහරෙන් වැඩම කරවීම සිදුකෙරෙන බවයි බෙංගමුවේ ධම්මදින්න හිමි කීය.

ඒ අනුව රත්නපුර මාර්ගයේ පෙරහර ශ්‍රී පාද උඩමළුවේ සිට ගල්පොත්තාවල ශ්‍රී පාද රජමහා විහාරස්ථානය දක්වා අද (31) අලුයම ගමන් කෙරුණි.

එසේ වැඩම කළ සධාතුක කරඩුව, සමන් දේව ප්‍රතිමාව, දේව ආභරණ ශ්‍රී පාද අවාරය අවසන් වන තෙක් එම විහාරස්ථානයේ තැන්පත් කර තැබෙන බව උන්වහන්සේ වැඩිදුරටත් පැවසීය.