'දිට්වා' සුළි කුණාටුවෙන් පසු 'මාවිල්ආරු' සොරොව්වෙන් ජලය නිකුත් කෙරේ

'දිට්වා' සුළි කුණාටුවෙන් හානි වූ මාවිල්ආරු සොරොව්ව තාවකාලිකව පිළිසකරකර, ගොවීන් සඳහා ජලය නිකුත් කිරීම අද (30) සිදු කළේය.

ඒ අනුව ගොවි සංවිධාන 47කට අයත් ගොවි පවුල් 14,000කට, අක්කර 25,000කට වැඩි ප්‍රමාණයක වී වගා කටයුතු සිදුකිරීමට යළි අවස්ථාව උදාවිය.

මාවිල්ආරු සොරොව්වේ ආරක්ෂක බැම්ම කි.මී. 5ක් පමණ දිගින් යුතුව ඇති අතර, සුළි කුණාටුව හේතුවෙන් එය ස්ථාන 12කින් කි.මී. 1.5ක පමණ ප්‍රමාණයකින් හානි සිදුවිය.

ඒ අනුව එහි ප්‍රතිසංස්කරණ කටයුතු මේ වනවිට ආරම්භකර ඇති අතර, එතෙක් යල කන්නයේ වගා සඳහා තාවකාලික බැම්මක් ඉදිකර මෙලෙස අවශ්‍ය ප්‍රමාණයට ජලය රඳවා ගැනීමට වාරිමාර්ග දෙපාර්තමේන්තුව කටයුතු කර ඇත.
 
මාවිල්ආරු ජලාශයෙන් කල්ලාරු, දෙහිවත්ත, නීලපොල, ඊචලාම්පත්තු, සේරුනුවර යන ගම්මාන සඳහා මෙලෙස ජලය නිකුත් කරනු ලැබීය.

මෙම අවස්ථාවට විදේශ කටයුතු සහ විදේශ රැකියා නියෝජ්‍ය අමාත්‍ය අරුන් හේමචන්ද්‍ර මහතා ඇතුළු පිරිසක් සහභාගි වූහ.