රාමසාන් වෙනුවෙන් මුස්ලිම් රාජ්ය සේවකයින්ගේ වැඩමුරවල වෙනසක්
January 10, 2026 03:50 pm
රාමසාන් සමයේ දී මුස්ලිම් රාජ්ය සේවකයින් සඳහා ආගමික වතාවත්වල යෙදීමට හැකි වන පරිදි වැඩමුර සකස් කර දෙන ලෙස රාජ්ය පරිපාලන, පළාත් සභා සහ පළාත් පාලන අමාත්යංශය රාජ්ය ආයතන වෙත දැනුම් දී තිබේ.
අමාත්යංශ ලේකම්වරුන්, පළාත් ප්රධාන ලේකම්වරුන්, දෙපාර්තමේන්තු ප්රධානීන්, රාජ්ය සංස්ථා සහ ව්යවස්ථාපිත මණ්ඩල ප්රධානීන් වෙත චක්රලේඛයක් නිකුත් කරමින් අදාළ දැනුම් දීම සිදුකර ඇති බව වාර්තා වේ.
මෙවර රාමසාන් සමය පෙබරවාරි 19 වන දින සිට මාර්තු 21 වන දින දක්වා පැවැත්වීමට නියමිත බැවින් එම කාල සීමාව තුළ මුස්ලිම් රාජ්ය සේවකයින්ට ආගමික වතාවත්වල යෙදීමට හැකිවන පරිදි වැඩමුර සකස් කර දිය යුතු බව අදාළ චක්රලේඛයේ සඳහන්ය.
නොවැළැක්විය හැකි අවස්ථාවලදී පමණක් විශේෂ නිවාඩු අනුමත කරදෙන ලෙස ද රාජ්ය පරිපාලන අමාත්යංශය නිකුත් කළ චක්රලේඛයේ සඳහන් ය.
රාමසාන් අවසන් වීමට දින 14කට පෙර රාජ්ය සේවයේ රාජ්ය සංස්ථා හා ව්යවස්ථාපිත මණ්ඩලවල සුදුසුකම් ඇති මුස්ලිම් නිලධාරීන් සඳහා උත්සව අත්තිකාරම් ලබාදීමට ද කටයුතු කරන ලෙස රාජ්ය පරිපාලන අමාත්යංශය වැඩිදුරටත් දැනුම් දී තිබේ.
