හිටපු ජනපතිගේ අත්සන හොරට යෙදූ බැංකු නිලධාරියා වරද පිළිගනී
September 6, 2023 02:32 pm
හිටපු ජනාධිපති ගෝඨාභය රාජපක්ෂ මහතාගේ අත්සන ව්‍යාජ ලෙස යොදා ගනිමින් ව්‍යාජ ලෙඛන සකස් කළ බව කියන රාජ්‍ය බැංකුවක බැංකු නිලධාරියා එම සිද්ධිය සම්බන්ධයෙන් වරද පිළිගෙන තිබේ.
ඒ අනුව ඔහුට එරෙහිව දැඩි අවවාද මත අත්හිටවූ සිරදඬුවම් නියම කිරීමට කොටුව මහෙස්ත්‍රාත් තිළිණ ගමගේ මහතා අද (06) පියවර ගත්තේය.
විවෘත අධිකරණයේ නඩුව කැඳවූ අවස්ථාවේදී සැකකරු ඊට පෙනී සිටි අතර ඔහු එම සිද්ධිය සම්බන්ධයෙන් වරද පිළිගන්නා බව ඔහු වෙනුවෙන් පෙනී සිටි නීතිඥවරයා අධිකරණයට දන්වා සිටියේය.
ඒ අනුව එක් චෝදනාවකට මාස හය බැගින් චෝදනා දෙකට වසරක සිරදඬුවම් දී එය වසර පහකට අත්හිටුවීමට නියම කළ මහෙස්ත්‍රාත්වරයා රුපියල් 1,500 දඩ මුදලක් නියම කළ අතර සැකකරුගේ ඇඟිලි සලකුණු ලබාගන්නා ලෙසද පොලීසියට නියම කළේය.
වැඩ තහනමකට ලක්වී ඇති මෙම නිලධාරියා යළි සේවයේ පිහිටුවීම යටතේ ව්‍යාජ ලිපි ශීර්ෂයක ජනාධිපතිවරයාගේ අත්සන ව්‍යාජ ලෙස යොදා ඉදිරිපත් කළ ව්‍යාජ ලේඛන සිද්ධියක් සම්බන්ධයෙන් ඉකුත් 2020 මාර්තු මස 28 වනදා අත්අඩංගුවට ගෙන අධිකරණයට ඉදිරිපත් කිරිමෙන් අනතුරුව රක්ෂිත බන්ධනාගාර ගත කිරීමෙන් අනතුරුව ඇප මත මුදා හැර තිබුණි.
සැකකරු ඉදිරිපත් කළ මෙම ව්‍යාජ ලිපිය අදාළ රාජ්‍ය බැංකු මූලස්ථානය වෙත ලබාදීමෙන් අනතුරුව එහි කළමණාකරුට සැක සිතී රහස් පොලීසිය වෙත එය යොමු කිරීමෙන් අනතුරුව සැකකරුව අත්අඩංගුවට ගෙන තිබුණි.
