යූරියා ඇතුළු සියලු පොහොර ආනයනයට පියවර
April 30, 2022 09:06 am
ඉදිරියේදී මෙරට තුළ සිදුවිය හැකි ආහාර අර්බුදයකට එරෙහිව සාර්ථකව මුහුණ දීම සඳහා අවශ්‍ය පියවර ගෙන ඇති බව කෘෂිකර්ම අමාත්‍ය ජානක වක්කුඹුර මහතා පවසයි.
විශ්වවිද්‍යාල ආචාර්යවරුන්ගේ එකමුතුවක් විසින් පසුගියදා මාධ්‍ය හමුවක් පවත්වමින් කියා සිටියේ මෙරට ජනතාවට ඉදිරියේ දී ආහාර අර්බුදයකට මුහුණ දීමට සිදුවන බවය.
පසුගිය මහ කන්නයේදී රසායනික පොහොර ආනයනය තහනම් කිරීමත් සමග මෙරට කෘෂිකර්මාන්ත ක්ෂේත්‍රයට ඇති වූ බලපෑම හේතුවෙන් ආහාර අර්බුදයක් සිදුවිය හැකි බව ඔවුන් විසින් පෙන්වා දී තිබුණි.
මේ අතර, දැනට වෙ‍ෙළඳපොළේ ඉහළ මිල ගණන් යටතේ අලෙවි වන සහල් මිල පාලනය කිරීම සඳහා අවශ්‍ය පියවර ගෙන ඇති බව කෘෂිකර්ම අමාත්‍ය ජානක වක්කුඹුර මහතා පැවසීය.
එහිදී වී අලෙවි මණ්ඩලය මගින් ලබාගන්නා සහ ආනයනය කරනු ලබන සහල් තොග සතොස, සමූපාකාර ඇතුළු සුපිරි වෙළෙඳසැල් හරහා අලෙවි කරමින් සහල් මිල පාලනය කිරීමට කටයුතු කරන බව "අද දෙරණ" කළ විමසීමක දී අමාත්‍යවරයා ප්‍රකාශ කළේය.
එමෙන්ම මහ කන්නයේ දී වගා හානි සිදුවූ ගොවීන්ට වන්දි මුදල්වලින් කොටසක් ලබන මස මුල් සති දෙක තුළ ලබාදීමට අපේක්ෂා කරන බව ද කෘෂිකර්ම අමාත්‍ය ජානක වක්කුඹුර මහතා පැවසීය.
මේ අතර, පෞද්ගලික අංශය මගින් පොහොර මිටියක් රුපියල් 37,000 ක් වැනි ඉහළ මිල ගණන් යටතේ අලෙවි කරන බවට වාර්තා වන බව අමාත්‍යවරයා පවසයි.
මේ හේතුවෙන් මෙවර යල කන්නයේ වගා කටයුතු සඳහා බාධා එල්ල වී ඇති නමුත් ඉන් පසුව පැමිණෙන මහ කන්නය සඳහා අවශ්‍ය යූරියා ඇතුළු සියලු පොහොර ආනයනයට පියවර ගෙන ඇති බව කෘෂිකර්ම අමාත්‍යවරයා ප්‍රකාශ කළේය.
රජයේ පොහොර සමාගම් දෙක මගින් අවශ්‍ය රසායනික පොහොර ආනයනයට කටයුතු කර ඇති අතර පොහොර ආනයනය කරන සමාගම් සඳහා මිල සූත්‍රයක් ද හඳුන්වාදෙන බව කෘෂිකර්ම අමාත්‍යවරයා වැඩිදුරටත් පැවසීය.
